سه‌رۆکی هه‌رێم و وه‌زیری دادی عێراق کێشە یاساییەکانی موڵکداری و خاوەنداریەتی لە ناوچەکانی ماددەی 140 تاوتوێیان کرد

سەرۆکی هەرێمی کوردستان پێشوازی لە وەزیری دادی عێراق کرد.

سەرلەبەیانی ئەمڕۆ دووشەممە ١\٢\٢٠٢١  نێچیرڤان بارزانی، سەرۆکی هەرێمی کوردستان پێشوازی لە بەڕێز سالار عەبدولستار محەمەد وەزیری دادی عێراق کرد.
لە دیدارێکدا دۆخی دەسەڵاتی دادوەری لە عێراق و کاری وەزارەتی دادوەری و دامەزراوەکانی ئەو بوارە تاوتوێ کرا و جەخت لە گرنگی و پێویستیی پاراستنی سەروەریی یاسا و سەربەخۆییی دەسەڵاتی دادوەری و دادگاکان کرایەوە.
پێویستیی هاوکاری و هەماهەنگیی نێوان لایەنە پەیوەندارەکانی هەردوو وەزارەتی داد لە عێراق و هەرێمی کوردستان و میکانیزمی ئەو هاوکارییە و چۆنیەتیی هەماهەنگیی نێوانیان، کێشە یاسایییەکان بەتایبەتی دەربارەی موڵکداری و خاوەنداریەتی لە ناوچەکانی مادەی ١٤٠ی دەستوور و سوودوەرگرتنی وەزارەتی دادی هەرێمی کوردستان لە خول و ڕاهێنانەکانی وەزارەتی دادی عێراق، چەند تەوەرێکی دیکەی دیدارەکە بوون.