سەرۆکی پەرلەمانی عێراق پرسه‌نامه‌یه‌کی بۆ کۆچی دوایی د. رۆژ نوری شاوه‌یس بڵاوکردەوە

محەمەد حەلبووسی، سەرۆکی پەرلەمانی عێراق، بۆ کۆچی دوایی د. رۆژ نوری شاوەیس ئه‌ندامی مه‌كته‌بی سیاسی پارتی دیموكراتی كوردستان، پرسەنامەیەکی بڵاوکردەوە.

لە پرسەنامەکەی سه‌رۆكی په‌رله‌ماندا هاتووه‌: بە خەم و پەژارەیەکی زۆرەوە هەواڵی کۆچی دوایی سیاسەتمەداری باڵا و ئەندامی مەکتەبی سیاسی پارتی دیموکراتی کوردستان  دکتۆر رۆژ نووری شاوەیس مان پێگەیشت.

سه‌رۆكی په‌رله‌مان راشیگه‌یاندووه‌: دوای رازیبوون بە قەدەری خوای گەورە، لە خوای گەورە داواکاین سەبوری کەسوکار و خۆشەویستانی بدات و کوچکردوو بەر رەحمەتی خۆی بخات و بە بەهەشتی بەرینی خۆی شادی بکات.

 به‌یانی ئه‌مرۆ دووشه‌ممه‌ 15 ى 2 ى 2021 ، د. رۆژ نووری شاوەیس، ئەندامی مەکتەبی سیاسی پارتی دیموکراتی کوردستان لەتەمەنی 74 ساڵی و بە نەخۆشی له‌یه‌كێك له‌نه‌خۆشخانه‌كانی شاری هه‌ولێر کۆچی دواییکرد.

 د. رۆژ نوری شاوه‌یس له‌ساڵی 1947 لە سلێمانی لەدایکبووە ، کۆلێژی ئەندازیاری لە زانکۆی موسڵ خوێندووە، لە هەڵبژاردنی ساڵی 1992 سەرۆکی لیستی پارتی بووە.
لە کابینەی یەکەمی حکومەتی هه‌رێمی كوردستاندا، جێگری سەرۆک وەزیران بووە ، ساڵی 1999-2003 سەرۆکی پەرلەمانی کوردستان بووە ، سەرۆک وەزیرانی کابینەی سێیەم لە حکومەتی هەرێمی کوردستان ، ساڵی 2004 جێگری سەرۆک وەزیرانی عێراق بووە.

د.رۆژ نوری شاوەیس چەندین جار وەک بەرپرسی شاندی دانوستانکاری هەرێمی کوردستان لەگەڵ بەغدا ئامادەی گفتوگۆکانی نێوانی هەرێم و بەغدا بووە.

ئەمڕۆش دواى ماوەیەک لە نەخۆشکەوتنى،  له‌شاری هه‌ولێر کۆچى دوایى کرد.