پشتی ل رۆژێن بۆری ل بەرامبەر وەزیرێ ناڤخۆ یێ حکومەتا ھەرێما کوردستانێ سیندا یاسایی خوارین ئەڤرۆ رۆژا ٨/٧/٢٠٢١ د دو رێورەسمێن جودا دا ب ئامادەبوونا (پ.د.عەلی تەتەر) پارێزگەرێ دھۆکێ (مشیر محەمەد بەشیر) وەکو قایمقامێ نوی یێ قەزا زاخۆ و (وارشین سەلمان) وەکو قایمقامێ نوی یێ قەزا ئامێدیێ دەستبکاربوون.
پ.د.عەلی تەتەر، پارێزگەرێ دھۆکێ ئاشکرا کر کو پشتی کو ل ھەیاما بۆری (بوتان محسن) قایمقامێ قەزا زاخۆ ھاتیە خانەنشینکرن ئەڤرۆ (مشیر محەمەد بەشیر) وەکو قایمقامێ نوی یێ قەزا زاخۆ ل جھێ وی دەستبکاربوو و گۆت: ل دەف مە بەرپرسیارەتی خزمەتە و دڤێت ئەم ھەمی دگەل ئێک د ھەڤکاربین د رێڤەبرنا ئیدارێ دا و نەھێلین لەنگی بکەڤیتی، ژ بەر کو بەرپرسیارەتیا وی بەرپرسی بلندترە یێ کو بشێت پتر خزمەتێ بۆ ھەر تاکەکێ د ناڤ ڤی وەلاتی دا بێ جوداھی بکەت د چارچوڤێ یاسایێ دا و بۆ ھەر کەسەکی جھێ شانازیێ یە خزمەتا باژێرێ زاخۆ بکەت، چونکو باژێژێ زاخۆ خزمەتا ھەمی کوردستانێ یا کری، ل دەمەکێ نێزیک ئیدارەیا سەربەخوەیا زاخۆ دێ ھێتە راگەھاندن پشتی پرۆسا قەزابوونا ناحیا باتیفا ب دووماھی دھێت و ھندەک رێڤەبەریێن نوی بھێنە ڤەکرن و ھندەک رێڤەبەری ببنە رێڤەبەریێن گشتی.
پارێزگەرێ دھۆکێ درێورەسمێن دەستبکاربوونا قایمقامێ نوی یێ قەزا ئامێدیێ دا ئاشکرا کر کو ئەڤرۆ (وارشین سەلمان) وەکو قایمقامێ نوو یێ قەزا ئامێدیێ ل جھێ (ئیسماعیل مستەفا) قایمقامێ بەرێ یێ قەزا ئامێدیێ دەستبکاربوو و گۆت: قەزا ئامێدیێ ئێک ژ وان قەزایایە یێن کو ژ گەلەک تشتان ھاتیە بێ بەھرکرن ژ بەر ڤێ چەندێ سەرۆکێ حکومەتا ھەرێما کوردستانێ ژی ھەست ب ڤێ چەندێ کر و دەمێ سەرەدانا پارێزگەھا دھۆکێ کری بریار دا رێژەکا باش یا پرۆژێن خزمەتگۆزاری ل ڤێ قەزایێ بھێنە چێکرن و نوکە بەھرا پتریا ڤان پرۆژان کەفتینە د بوارێ بجھئینانێ دا و ھندەک ژوان د قۆناغێن دۆماھیێ دانە و دێ ھەمی بزاڤان کەین ب شێوەیەکێ باشتر خزمەتا ڤێ قەزایێ و ھەمی قەزایێن دی یێن ەر ب پارێزگەھا دھۆکێ ڤە بێ جوداھی بکەین.
کۆمێنت (0)
تا ئێستا هیچ کۆمێنتێک نەکراوە.