ئەمڕۆ چوارشەم، مەسرور بارزانی سەرۆکی حکوومەتی هەرێمی کوردستان پێشوازی لە سەرۆک و ئەندامانی مەکتەبی تەنفیزی یەکێتیی زانایانی ئایینی ئیسلامی کوردستان کرد.
لە کۆبوونەوەکەدا، مامۆستا مەلا عەبدوڵا وەیسی سەرۆکی یەکێتی زانایانی ئایینی ئیسلامی کوردستان ستایشی چاکسازییەکانی کابینەی نۆیەمی حکوومەتی هەرێمی کوردستانی کرد و پشتیوانی زانایانی ئیسلامی لە پڕۆسەی چاکسازی و ڕووبەڕووبوونەوەی گەندەڵی و هەوڵەکانی سەرۆکی حکوومەت بۆ تێپەڕاندنی قەیرانەکان و باشترکردنی ژیانی هاووڵاتییانی هەرێمی کوردستان دەربڕی.
سەرۆکی حکومەتیش ڕۆڵی گرینگی زانایانی ئایینی ئیسلامی لە هوشیارکردنەوەی کۆمەڵگە و برەودان بە کولتووری بەیەکەوەژیانی ئاشتییانەی نێوان پێکهاتە جیاوازەکانی هەرێمی کوردستان بەرز نرخاند.
سەرۆکی حکومەت ههروهها هیوای خواست زانایانی ئایینی بەردەوامبن لە ڕووبەڕووبوونەوەی هزری تووندڕەوی و بەرگریکردن لە ماف و دەسکەوتەکانی گەلی کوردستان و پرسە نیشتمانییەکان و پەرەپێدانی پەیامی لێبوردەیی و خۆشەویستی لە نێو کۆمەڵگەدا.
کۆمێنت (0)
تا ئێستا هیچ کۆمێنتێک نەکراوە.