کۆمیسیۆنی باڵای سەربەخۆی ھەڵبژاردنەکان لە عێراق رایگەیاند کە تا ئێستا، 200 سەرپێچییان لە میانی بانگەشەی ھەڵبژاردنەکان تۆمارکردووە.
نیبراس ئەبو سۆدە، یاریدەدەری گوتەبێژی کۆمیسیۆنی باڵای سەربەخۆی ھەڵبژاردنەکان لە عێراق، لە لێدوانێکی رۆژنامەوانییدا ئاماژەی بەوەداوە کە رێوشوێنی پێویستیان لەبارەی سەرپێچی و پێشێلکارییەکان لەلایەن کاندیدانەوە لە میانی بانگەشەی ھەڵبژاردنەکان گرتووەتەوەبەر و گوتی: "تا ئێستا لە پارێزگاکان، 200 سەرپێچمان لە میانی بانگەشەی ھەڵبژاردنەکان لەلایەن کاندیدانەوە تۆمارکردووە، ھەروەھا سەرپێچکارانیش بە پێبژاردنی 250 ھەزار دینار بۆ یەک ملیۆن دینار سزا دراون".
نیبراس ئەبو سۆدە ئاشکراشی کردووە کە تا ئێستا ژمارەیەک کاندید بەهۆکاری جیاجیا، دوورخراونەتەوە و ژمارەیەکی دیکەیش بە ئامانجی تەواوکردنی رێوشوێنە یاساییەکان لەبەرامبەریان، رەوانەی دەسەڵاتی دادوەریی کراون.
جەختیشی کردەوە کە فشارە دەرەکییەکان کاریگەرییان نابێت لەسەر کاری کۆمیسیۆن و گوتی: "رێگا نادرێت ھیچ لایەنێک دەست وەرداتە کاروباری کۆمیسیۆنەوە".
کۆمێنت (0)
تا ئێستا هیچ کۆمێنتێک نەکراوە.