پاش کەمێکی تر کاروانی نۆیەمی کۆچبەران کە ژمارەیان نزیکەی 420 کۆچبەرە، بۆ هەرێمی کوردستان دەگەڕێنەوە.
ئالان ئەحمەد پەیامنێری کوردستان تیڤی ڕایگەیاند: کاتژمێر 05:00 ـی ئێوارەی ئەمڕۆ 417 کۆچبەر کە لە نێوان سنووری بێلاڕووسیا و پۆڵەندا گیریا خواردبوو بۆ هەرێمی کوردستان دەگەڕێنەوە و لە فڕۆکەخانەی نێودەوڵەتیی هەولێر دادەبەزن.
هەروەها ڕایگەیاند: بە گەڕانەوەی ئەم کاروانە بۆ هەرێمی کوردستان دەبێتە نۆیەمین کاروان کە تا ئێستا گەڕاونەتەوە.
ڕاشیگەیاند: تا ئێستا 3 هەزار و 586 کۆچبەر بە ئارەزوومەندانە بۆ هەرێمی کوردستان گەڕاونەتەوە، هەروەها ژمارەیەکی زۆر لە کۆچبەران لە مینسکی پایتەختی بێلاڕووسیاوە خۆیان ناونووس کردووە بۆ گەڕانەوەیان.
جێی باسە ژمارەیەک کۆچبەر لە سنووری نێوان بێلاڕووسیا و پۆڵەندا گیریان خواردووە، لە نێویاندا ژمارەیەکی زۆر لە هاووڵاتییانی کوردستان و عێراقی تێدایە، فەرمانگەی پەیوەندییەکانی دەرەوەی حکوومەتی هەرێمی کوردستان و وەزارەتی دەرەوەی عێراق ئەو کۆچبەرانە دەگەڕێننەوە کە ئارەزوو دەکەن بگەڕێنەوە وڵاتەکەیان.
کۆمێنت (0)
تا ئێستا هیچ کۆمێنتێک نەکراوە.