گه‌ڕانه‌وه‌ی ته‌رمی قوربانییانی ڕووداوه‌که‌ی نۆکه‌ندی ئینگلیزی دواخرا

بڕیاربوو به‌ره‌به‌یانی سبه‌ی هه‌ینی ته‌رمی ئه‌و 16 كۆچبه‌ره‌ی كه‌ له‌ نۆكه‌ندی ئینگلیز خنكابوون بگه‌ڕێنه‌وه‌ هه‌رێمی كوردستان، به‌ڵام گه‌ڕانه‌وه‌ی ته‌رمه‌كان دواخراوه‌.

ئاری جه‌لال سه‌رۆكی ده‌زگای لووتكه‌ ڕایگه‌یاند: وا بڕیار بوو کاتژمێر 3:35 خولەکی بەرەبەیانی سبه‌ی هه‌ینی  تەرمی قوربانییانی ڕووداوه‌كه‌ی نوکەندی ئینگلیز بگەنەوە هەولێر، به‌ڵام گه‌شتی فڕۆكه‌ی گه‌ڕانه‌وه‌ی ته‌رمه‌كان دواخراوه‌.

ڕاشیگه‌یاند: گه‌شتی فڕۆكه‌كه‌ بۆ ماوەی 24 کاتژمێر دوا دەکەوێت، واته‌ بڕیاره‌ بەرەبەیانی دووسبه‌ی شەممە ته‌رمه‌كان بگه‌نه‌وه‌ فڕۆکەخانەی نێوده‌وڵه‌تی هەولێر.

ئه‌مه‌ له‌ كاتێكدایه‌ كه‌ فه‌رمانگه‌ی میدیا و زانیاریی حكوومه‌تی هه‌رێمی كوردستان ڕایگه‌یاندبوو: بەرەبەیانی رۆژی هەینی 24 کانوونی یەکەمی 2021، لەسەر ئەرکی مەسرور بارزانی سەرۆکی حکوومەتی هەرێمی کوردستان و لە ڕێگەی فڕۆکەخانەی نێودەوڵەتی هەولێرەوە، تەرمی ئەو 16 قوربانییەی کە لە ئاوی نێوان فەڕەنسا و بەریتانیا لە ڕۆژی 24 تشرینی دووەمی 2021 گیانیان لەدەست دا، دەگەڕێندرێنەوە هەرێمی کوردستان.