له‌لایه‌ن چه‌ند که‌سێکه‌وه‌ هێرشده‌کرێته‌ سه‌ر جواو کانسێلۆی پورتوگالی و بەرگریکاری مانچستەرسیتی

جواو كانسێلۆی پۆرتوگالی و بەرگریكاری یانەی مانچستەرسیتی ڕایگەیاند، چوار كەسی دەمامكدار هێرشیان كردۆتە سەر ماڵەكەی و ئەویش بەرگری لە خۆی و ئەندامانی خێزانەكەی كردووەو ڕووبەڕووی هێرشكاران بۆتەوە، بۆیە كەمێك ئازاری پێگەیشتووە.
 كانسێلۆ ئاشكراشی كرد كە چوار كەسەكە تەواوی زێڕو خشڵەكانی ماڵەكەیان دزیوە، گوتیشی، ئەو ترسنۆكانە هەوڵیاندا ئازاری خۆم و ئەندامانی خێزانەكەم بدەن، بەڵام ڕووبەڕوویان وەستامەوەو هەروەك بە دەموچاومەوە دیارە چیان لێكردووم، گرنگ ئەوەیە نەیانتوانی خێزانەكەم ئازار بدەن، بەڵام تەواوی زێڕەكانی ماڵەكەیان لێ دزیم و هەڵاتن.
 هەر لەبارەی ئەم ڕووداوە ئیدارەی یانەی مانچستەرسیتی لە بەیاننامەیەكدا ڕایگەیاند كە شۆك بوون و حەپەسان بە بیستنی هەواڵی هەڵكوتانە سەر ماڵی كانسێلۆ و ئازاردانی لە لایەن چوار كەسی دەمامكداری نەناسراوەوە.
 هەر لە بەیاننامەكەدا ئیدارەی سیتیزێنز جەختیكردەوە كە ئەم ڕووداوە پێشهاتێكی مەترسیدارەو هێزەكانی پۆلیسی بریتانیا هەڵمەتێكیان بۆ دەستگیركردنی تۆمەتباران دەستپێكردووە.