بڕیاری ده‌ستگیركردن بۆ بكوژی گه‌نجه‌كه‌ی دهۆك ده‌رچوو

نووسینگەی ڕێکخەری ڕاسپاردە نێودەوڵەتییەکان رایده‌گه‌ێنێت: لێکۆڵینەوە لە کەیسی دۆسکی ئازاد دەستیپێکردووە و تۆمەتبار بڕیاری گرتنی بۆ دەرچووە

ڕۆژی دووشەم، ڕێککەوتی 31/1/2022، پۆلیسی دهۆک لە بوونی تەرمێک ئاگادارکرایەوە کە هی کەسێک بوو بە ناوی دۆسکی ئازاد، کە پێشتر ڕەگەزی خۆی بۆ ڕەگەزی مێ گۆڕیبوو.

لێکۆڵینەوە سەرەتاییەکان و وتەی ئەندامانی خێزانی ناوبراو، دەریانخست کە دۆسکی ئازاد لەلایەن برایەکی خۆیەوە کوژراوە و تەرمەکەی بەر لە چەند ڕۆژێک لە دۆزینەوەی لە نزیک گوندێک لە شاری دهۆک فڕێدراوە. 

پۆلیسی دهۆک و لایەنە پەیوەندیدارەکان ڕاستەوخۆ پەڕاوی لێکۆڵینەوەیان کردۆتەوە و تۆمەتبار بە گوێرەی ماددەی ٤٠٦ لە یاسای
 سزادانی عێراقی (کوشتنی ئەنقەست) بڕیاری دەستگیرکردنی لەلایەن دادگای لێکۆڵینەوەی دهۆکەوە بۆ دەرچووە. 

دەزگا ئەمنییەکان ناوی تۆمەتبارەکەیان لە تەواوی فڕۆکەخانەکان و خاڵە سنوورییەکان بڵاوکردۆتەوە و بەدواداچوون و لێکۆڵینەوە بەردەوام، بەڵام تەرمی دۆسکی ئازاد دوای دەرچوونی تۆمەتبارەکە لە وڵات دۆزراوەتەوە.

تۆمەتبار هەشت ساڵە هەرێمی کوردستانی جێهێشتووە و لە یەکێک لە وڵاتە ئەوڕوپیەکان نیشتەجێیە. لە نێوان 17 بۆ18ی مانگی 12ی 2021 گەڕاوەتەوە بۆ ئەنجامدانی ئەم تاوانکارییە.

سەرەڕای ئەوەی هەندێک دیاردە هەن کە پێچەوانەی یاسا و نەریتە کۆمەڵایەتییەکانن، بەڵام ئەم دیاردانە دەبێت لە چوارچێوەی یاسا و دادگاکان مامەڵەیان لەگەڵ بکرێت. هەرێمی کوردستان هەر شوێنێکی ئارام دەمێنێتەوە بۆ پڕاکتیزەکردنی ئازادییە تاکەکەسییەکان.