ئەمڕۆ سەرۆكی حكوومەتی هەرێمی كوردستان سەردانی قەتەر دەكات 

دوێنێ نووسینگەی رۆژنامەوانیی سەرۆكی حكوومەتی هەرێمی كوردستان بڵاوی كردەوە كە سبەی سێشەممە كە( دەكاتە ئەمڕۆ) مەسرور بارزانی لە سەر بانگهێشتی فەرمی میری قەتەر، شێخ تەمیم بن حەمەد ئال سانی، بە یاوەری شاندێكی حكوومی، سەردانی قەتەر دەكات.
نووسینگەی رۆژنامەوانیی سەرۆكی حكوومەت راشیگەیاندووە كە مەسرور بارزانی لە سەردانەكەیدا، جگە لە كۆبوونەوە لە گەڵ میری قەتەر، هەروەها لە گەڵ بەرپرسانی باڵای دیكەی ئەو وڵاتەش كۆدەبێتەوە.
ئەوەیشی خستووەتەڕوو كە لە كۆبوونەوەكانی سەرۆكی حكوومەتی هەرێمی كوردستان لەگەڵ بەرپرسانی باڵای قەتەر، گفتوگۆ دەكرێت دەربارەی پەرەپێدانی پەیوەندی دوولایەنە، بەتایبەتی لە بواری ئاڵوگۆڕی بازرگانیی، وەبەرهێنان، وزە و كشتوكاڵ.