بەڕێوەبەری ئاو و ئاوەڕۆی ھەرێم: ئەمساڵ پلان ھەیە 300 پڕۆژەی ئاو و ئاوەڕۆ جێبەجێ بکرێن

 بڕیارە ئەمساڵ ژمارەیەکی بەرچاو پڕۆژەی ئاو لە ھەرێمی کوردستان بخرێنە بواری جێبەجێکرن و بەڕێوەبەری گشتیی ئاویش  رایده‌گه‌ێنێت، بەشێک لەو پڕۆژانە ستراتیژین و کێشەی کەمئاوی چارەسەر دەکەن.
ئاری ئەحمەد، بەڕێوەبەری ئاو و ئاوەڕۆی ھەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند: حکوومەت ئامادەکاری بۆ پڕۆژەکانی ئەمساڵ دەکات و بەڕێوەبەرایەتیی گشتیی ئاویش خەریکی ئامادەکردنی پڕۆژەکانە لەسەر ئاستی جیاواز و پڕۆژەکانیش پێک دێن لە پڕۆژەی ستراتیژی و پڕۆژەی مامناوەند و بچووک، ھەموو پڕۆژەکان لەسەر ھەموو ناوچەکانی ھەرێمی کوردستان دابەش کراون و ژمارەیان 300 پڕۆژە دەبێت.
بەڕێوەبەری گشتیی ئاو و ئاوەڕۆ راشیده‌گه‌ێنێت: پڕۆژەکانی ئەمساڵ ھەموو بوارەکانی ئاو و ئاوەڕۆی لەخۆ گرتووە و بەشێک لەو پڕۆژانەش ستراتیژین وەک چارەسەرکردنی کێشەی کەمئاوی لە سەنتەری شار و شاروچکەکان، وەک پڕۆژەی چواری ئیفراز بۆ ھەولێر و دەوروبەری، ھەروەھا چارەسەرکردنی کێشەی کەمئاوی لە قەزای چەمچەماڵ.
ئاری ئەحمەد ئاماژه‌ به‌وه‌شده‌كات: پڕۆژەی ئاوەڕۆش ئەمساڵ خراونەتە پلانی حکووومەت لەوانەش پڕۆژەی ئاوەڕۆی ھەولێر، ئەوانی دیکەش پڕۆژەی جۆراوجۆرن لە ڕاکێشانی تۆڕی ئاولێدانی بیر و نۆژەنکردنەوە و چەندین پڕۆژەی دیکەی بواری ئاو، ئەمانە ئەگەر بکەونە بواری جێبەجێکردن ئەوە بێگومان کاریگەرییان لەسەر کەمبوونەوەی کێشەی کەمئاوی دەبێت.