مەکتەبی سیاسی پارتی دیموکراتی کوردستان لە ڕاگەیەنراوێکدا پەلامارەکەی سەر نووسینگەی جێگری سەرۆکی ئەنجوومەنی نوێنەرانی عێراق سەرکۆنە دەکات.
مەکتەبی سیاسی پارتی دیموکراتی کوردستان ئەمڕۆ چوارشەممە ڕاگەیەنراوێکی بڵاوکردەوە و ڕایگەیاند: بە تووندی ئەو پەلامارە سەرکۆنە و ڕیسوا دەکەین، پاراستنی ماف و ژیانی هاووڵاتییان و بەرپرسان بەبێ جیاوازی لە ئەستۆی هێزە ئەمنییەکان و لایەنە پەیوەندیدارەکانی شارەکەیە.
دەقی ڕاگەیەنراوەکەی مەکتەبی سیاسی پارتی دیموکراتی کوردستان:-
مەکتەبی سیاسی پارتی دیموکراتی کوردستان ئیدانەی پەلامارەکەی سەر نووسینگەی هەڤاڵ شاخەوان عەبدوڵڵا دەکات
ئەمشەو ھێرشێکی تیرۆریستانەی شکستخواردوو کرایە سەر نووسینگەی هەڤاڵ(شاخەوان عەبدوڵڵا) جێگری سەرۆکی ئەنجوومەنی نوێنەرانی عیراق لە شاری کەرکووک، کە خۆشبەختانە زیانی گیانی نەبووە، ئێمە لە پارتی دیموکراتی کوردستان لە کاتێکدا زۆر بە توندی ئەو پەلامارە ئیدانە و ریسوا دەکەین، بە ئەنجامدەرانیشی رادەگەیەنین کە بە کردەوەی تیرۆرستی و شکستخواردوو شکستەکانیان چارەسەر و پەردەپۆش ناکرێن، ھاوکات پێمان وایە پاراستنی ماف و ژیانی هاووڵاتیان و بەرپرسان بەبێ جیاوازی لە ئەستۆی هێزە ئەمنییەکان و لایەنە پەیوەندیدارەکانی شارەکەیە.
لەم سۆنگەیەوە داوادەکەین بە زووترین کات تاوانکاران بە سزای رەوای خۆیان بگەن بۆ ئەوەی ئەو کارە تێکدەرانە و تاوانکاریانە دووبارە نەبنەوە و هەموو لایەکیش بە جیددی و بەرپرسیارانە کاربکەن بۆ رێگە گرتن لە کاری گێرەشێوێنی لە پێناو دابینکردنی ئەمنیەت و ئاسایشی ھاووڵاتیان و سەقامگیری گشتی.
مەکتەبی سیاسی
پارتی دیموکراتی کوردستان
19ـی کانوونی دووەمی 2022
کۆمێنت (0)
تا ئێستا هیچ کۆمێنتێک نەکراوە.