ئەمڕۆ پێنجشەم مەسرور بارزانی سەرۆکی حکوومەتی هەرێمی کوردستان پێشوازی لە (ڤینسنت ڤان هوتن) بەڕێوەبەری جێبەجێکاری ئەوروپا و ڕۆژهەڵاتی ناوەڕاست و نزیکی کۆمپانیای هێڵی ئاسنینی ئەڵمانی ( دۆیچە بان) کرد.
لە کۆبوونەوەکەدا کە (کلێمێنس زێمتنەر) کونسوڵی گشتیی ئەڵمانیا لە هەولێر ئامادەی بوو، نوێنەری کۆمپانیای دۆیچە بان کورتەیەکی دەربارەی لێکتێگەیشتنی نێوان حکوومەتی هەرێمی کوردستان و کۆمپانیای دۆیچە بان خستەڕوو بۆ ڕاوێژ و سەرپەرشتیکردنی هێڵی ئاسنین لە هەرێمی کوردستان.
نوێنەری کۆمپانیا ئەڵمانییەکە ئاماژەی بەوە دا کە ئەمە هەنگاوێکی سەرەتایییە بۆ دەستکردن بەم پڕۆژە گرینگە کە لە چەندین قۆناغ پێکدێت و لەلایەن چەند کۆمپانیایەکی جیاوازەوە ئەنجام دەدرێت .
سەرۆکی حکوومەت جەختی لە گرینگیی ئەنجامدانی ئەم پڕۆژە گرینگ و ستراتیجییە کردەوە بە ئاراستەی بنیاتنانی ژێرخانێکی بەهێزی ئابووری بۆ هەرێمی کوردستان و بەیەکەوەبەستنەوەی شار و ناوچەکان و پەرەپێدانی ئاڵوگۆڕی بازرگانی لەنێوان هەرێمی کوردستان و ناوچەکانی دیکەی عێراق و وڵاتانی دراوسێ و جیهان.
کۆمێنت (0)
تا ئێستا هیچ کۆمێنتێک نەکراوە.