ل سێ رۆژێن جەژنا نەورۆزێ ئاھەنگ دێ ل دھۆکێ ھێنە گێڕان

-رێڤەبەرێ گشتی یێ گەشتوگۆزارێ ل پارێزگەھا دھۆکێ  دیار کر کو د ھەر سێ رۆژێن جەژنا نەورۆزێ دا دێ ئاھەنگ ل پارێزگەھا دھۆکێ ھێنە گێڕان و ئامارا ھەتنا گەشتیاران ب ھەمان ھەلکەفت دێ بۆ دەمێ10 رۆژان ھێتە وەرگرتن.

پ.د.خەیری عەلی ئوسۆ، رێڤەبەرێ گشتی یێ گەشتوگۆزارێ ل پارێزگەھا دھۆکێ ئەڤرۆ رۆژا سێشەمبی 15-3-2022 د کۆنگرەکێ رۆژنامەڤانی دا پلانا رێڤەبەریێ بۆ جەژنا نەورۆزێ ڕاگەھاند کو ل رۆژا پێنجشەمبی 17-3-2022 دێ چەندین دیاری ژ لایێ رێڤەبەریا گشتی یا گەشتوگۆزارێ ل سەر نەخۆشێن تەلاسمیایێ ل پارێزگەھا دھۆکێ ھێنە بەلاڤکرن، ھەروەسا ل رۆژا 20-3-2022 کو رۆژا ھەلکرنا ئاگرێ نەورۆزێ یە دێ چار ترۆمبێلێن بارھەلگر کو بجوانترین شێوە ھاتینە خەملاندن دێ د ناڤ سەنتەرێ باژێرێ دھۆکێ دا ھاتنوچوونێ کەن و گوھداریا سترانێن نەورۆزێ دێ ھێتەکرن، سەرەرایی ڤێ چەندێ ل رۆژا ئێکێ یا جەژنا نەورۆزێ 21-3-2022 دێ ئاھەنگەکا جەماوەری ل (گەلی کورتکێ) ھێتە گێڕان و ل رۆژا دووێ یا جەژنا نەورۆزێ 22-3-2022 دێ ئاھەنگەکا جەماوەری ل (قارقاراڤا) ھێتە گێڕانو ل رۆژا سێیێ یا جەژنا نەورۆزێ 23-3-2022 دێ ئاھەنگەکا جەماوەری ل سەرێ چیایێ(زاوا) ل دھۆکێ ھێتە گێڕان و گۆت: "ئەڤ جھێن بۆ گێڕان ئاھەنگان ھاتینە دەستنیشانکرن ئەو جھێن یێن کو رێژەکا بەرچاڤ یا خەلکێ پارێزگەھا دھۆکێ د رۆژێن جەژنا نەورۆزێ دا سەرەدانێ بۆ دکەن، ئەڤە ددەمەکی دایە ل سەر ئاستێ رێڤەبەریێن گەشتوگۆزارێ ل قەزایێن (ئاکرێ، ئامێدیێ، شێخان) ژی دێ ئاھەنگ ل ھەر سێ رۆژێن جەژنا نەورۆزێ ل جھێن جوداجودا یێن وان قەزایان ھێنە گێڕان، ھەروەسا د ھەر سێ رۆژێن جەژنا نەورۆزێ دا دێ ب سەدان دیاری یێن جوراوجور ل وان جھێن ئاھەنگ لێ دھێنە گێڕان ل سەر سەیرانی و گەشتیاران ھێنە بەلاڤکرن.

ناڤھاتی ئاماژە دا وێ چەندێ کو ئامارا ھاتنا گەشتیاران ب ھەلکەفتا جەژنا نەورۆزێ دێ بۆ دەمێ 10 رۆژان ھێتە وەرگرتن ھەر ژ رۆژا پێنجشەمبی 17-3-2022 ھەتا رۆژا 26-3-2022 د ڤان رۆژان دا یێن کو ئامار تێدا دھێتە وەرگرتن ئەم پێشبینیا ھاتنا پتری 30 ھزار گەشتیاران دکەین و گۆت: سال بۆ سالێ رێژا ھاتنا گەشتیاران بۆ پارێزگەھا دھۆکێ بەرەف بلندبوونێ ڤە دچیت د سالا 2021 ێ دا ملیونەک و 500ھزار گەشتیاران سەرەدانا پارێزگەھا دھۆکێ کربوو د ھەیڤا ئێک و ھەیڤا دو یا ھەمان سال دا 54 ھزار گەشتیاران سەرەدانا پارێزگەھا دھۆکێ کربوو، بەلێ د سالا 2022 دا د ھەیڤا ئێک و ھەیڤا دوو دا پتری 130 ھزار گەشتیاران سەرەدانا پارێزگەھا دھۆکێ کریە.

ل دووماھیێ رێڤەبەرێ گشتی یێ گەشتوگۆزارێ ل پارێزگەھا دھۆکێ خویا کر کو بنگەھێن گەشتیاری یێن سنوورێ پارێزگەھا دھۆکێ ھەمی ھاتینە ئاگەھدارکرن کو د رۆژێن جەژنا نەورۆزێ دا د ڤەکری بن و ب باشترین شێوە پێشوازی و خزمەتکرنا گەشتیاران و وەلاتیێن پارێزگەھا دھۆکێ بکەن و داشکاندنان بۆ گەشتیاران د بھایان دا بکەن، بەلێ نە ل سەر بنەمایێ ئینانا خوارا کوالێتیا جوری، بەلکو ب بھایەکێ گۆنجایی خزمەتەکا باش پێشکێش بکەن و گۆت: ل پارێزگەھا دھۆکێ پتری 900 بنگەھێن گەشتیاری یێن مولەتدای و 250 ھاڤینگەھـ ھەنە، د سالا بۆری دا 2021 ێ (60) بنگەھێن نوی یێن گەشتیاری ل پارێزگەھا دھۆکێ ھاتبوونە ڤەکرن و ئەڤ سالە ژی ڤەکرنا بنگەھان یا بەردەوامە و ھەمی ئاسانکاری ژ لایێ مە ڤە د چارچوڤێ یاسایێ دا بۆ ھەمی وەلاتیان دھێنەکرن یێن کو بخوازن بنگەھێن گەشتیاری ل پارێزگەھا دھۆکێ ڤەکەن، ھەروەسا ل پارێزگەھا دھۆکێ 116 جھێن ڤەحەواندنێ ژ ئۆتێل و موتێل و شقێن ڕائێخستی ھەنە کو شەڤانە جھێ ڤەحەواندنا پتری 15 ھزار گەشتیاران ھەیە.