پارێزگاری هەولێر : هیچ شێوەیەك تیرۆریستان ناتوانن زەفەر بە هەرێمی كوردستان ببەن

پارێزگاری هەولێررایدەگەێنێت،پێویستە بە زووترین كات حكوومەتی عێراق بە هەماهەگی لەگەڵ حكوومەتی هەرێمی كوردستان، بە كردار هەنگاو بنێت بۆ جێبەجێكردنی رێككەوتنی ئەمنیی نێوان هەولێر و بەغدا.
ئومێد خۆشناو، پارێزگاری هەولێر، لە كۆنفڕانسێكی رۆژنامەوانیدا سەبارەت بە ئەو هێرشەی شەوی رابردوو كە لە رێگەی مووشەكەوە كرایە سەر دەوروبەری قەزای خەبات رایگەیاند: "نزیك بە كاتژمێر (8:30) خولەك لە سنووری ناحیەی بەرتلە شەش مووشەك ئاراستەی سنووری قەزای خەبات كرا كە بەخۆشحاڵییەوە هیچ زیانێكی گیانی و دارایی نەبووە، دووپاتی دەكەینەوە كە پێویستە بە زووترین كات حكوومەتی عێراق بە هەماهەگی لەگەڵ حكوومەتی هەرێمی كوردستان، بە كردار هەنگاو بنێت بۆ جێبەجێكردنی رێككەوتنی ئەمنیی نێوان هەولێر و بەغدا، چونكە ئەوە سەلمێندراوە كە تیرۆریستان سوود لە بۆشاییە ئەمنییەكانی نێوان پێشمەرگە و هێزە ئەمنییەكانی عێراق وەردەگرن بۆ كردارە تیرۆریستییەكانیان".
گوتیشی: "دڵنیایی بە خەڵكی سنووری قەزای خەبات و تێكڕای هەولێری پایتەخت دەدەین كە دۆخەكە ئارامە و بە هیچ شێوەیەك تیرۆریستان ناتوانن زەفەر بە هەرێمی كوردستان ببەن بە چاوكراوەیی و هەوڵ و ماندووبوونی هێزە ئەمنییەكان".
جەختیشی كردەوە"حكوومەتی عێراق بەرپرسیاری یەكەمە لەو جۆرە هێرشانەی دەكرێنە سەر هەرێمی كوردستان چونكە دەبێت هەرچی زووە هەنگاوی كرداری بنرێت بۆ پڕكردنەوەی ئەو بۆشاییە ئەمنییەی كە هەیە و لەوێوە هێرشەكان ئەنجام دەدرێن"
ئومێد خۆشناو، پارێزگاری هەولێر ئاشكراشی كرد كە زانیارییان هەیە لە شوێنی تەقاندنی مووشەكەكان، یەكێك لە مووشەكەكان تەقیوەتەوە، راشیگەیاند: "ئەگەر حكوومەتی عێراق نیازی هەبێت سەرچاوەی ئەو هێرشانە بدۆزێتەوە ئەوە بەڵگەیەكی زۆر گەورەیە و بە ئاسانی دەردەكەوێت".