وەزیری دارایی لە پەروێزخان: بۆ کۆتاییهێنان بە قۆرخکاری هەماهەنگ و هاوکاربن

وەزیری دارایی و ئابووری هەرێمی کوردستان ئەمڕۆ پێنجشەممە 2022/06/02 لەگەڵ سەرپەرشتیاری دەروازەی نێودەوڵەتی پەروێزخان کۆبووەوە، داوای کرد کە ھەموو لایەنە پەیوەندیدارەکان ھەماھەنگ و ھاوکاربن بۆ ئەوەی ھەموو جۆرە قۆرخکارییەک کۆتایی پێ بھێندرێت.

وەزارەتی دارایی و ئابووری هەرێمی کوردستان ڕایگەیاند: ئاوات جەناب نووری وەزیری دارایی و ئابووری بە یاوەری یاسین واحید بەڕێوەبەری گشتی دیوانی وەزارەت و بە ئامادەبوونی ساماڵ عەبدولرەحمان بەڕێوەبەری گشتی گومرکی ھەرێم و سەرپەرشتیاری دەروازەی نێودەوڵەتی پەروێزخان و نوێنەری سەرپەرشتیاری ئیدارەی گەرمیان و نوێنەری سەرجەم بنکە جیاوازەکانی ناو دەروازەکە و نوێنەری بازرگانانی سنووری ئیدارەکە کۆبوونەوەیەکی بەرفراوانی ئەنجام دا.

ڕاشیگەیاند: لە کۆبوونەوەکە وەزیری ئابووری گوتی کە لەژێر ڕۆشنایی بەدواداچوون و ئامارەکانی بەردەست جوڵە بازرگانی و گەشتیارییەکان لە ڕێگەی دەروازەکەوە بە ڕێژەیەکی بەرچاو کەمی کردووە و ئەوەش کاریگەری ڕاستەوخۆی لە کۆکردنەوەی داھات و مووچەی مووچەخۆران و بودجەی پرۆژەکان هه‌بووه‌.

ئەوەشی خستەڕوو کە وەزیری دارایی داواشی کرد کە ھەموو لایەنە پەیوەندیدارەکان ھەماھەنگ و ھاوکاربن لە بوژاندنەوەی جوڵەی بازرگانی و کارئاسانی بۆ بازرگانانی ناوخۆیی بەپێی ڕێنمایی و ڕێکارە ئیداری یاساییەکانی وەزارەتی دارایی و ھەموو جۆرە قۆرخکارییەک کۆتایی پێ بھێندرێت، ئەمەش لەپێناو ڕەخساندنی ھەلی بازرگانی و ھاوردەکردن و ھەناردەکردن بۆ سەرجەم بازرگانان بەبێ جیاوازی.

وەزارەتی دارایی ئاماژەی بەوەش داوە کە هەر لە کۆبوونەوەکە سەرجەم ئامادەبووان سەرنج و تێبینی و پێشنیارەکانیان بۆ ئەو مەبەستە خستەڕوو و لە کۆتاییدا وەزیری دارایی بڕیاری دا بە:

1- لەمەودوا بارەکانی ترانزێت کڵۆم دەکرێت و بەبێ مەئموور بەڕێ دەکرێت.

2- بازرگانان ئازادن لە بازرگانیکردن و حساباتی ڕەسیدیان لەگەڵ ناکرێت.

3- لابردنی ڕەسید بۆ ھەموو ئەو بارانە كە لە دەروازەكان هاوردە دەكرێت.

4-پیاداچوونەوە دەكرێت بۆ کەمکردنەوەی باجی گومرک.

5- پێداچونەوە بە لێخۆشبونی (202) ماددە کە حکوومەتی عێراق لێخۆشبوونی بۆ کردووە.

6- تەسریحەی گومرکی تەنھا یەک جار پارە وەردەگیرێت واته لە دووبارەبوونەوە هیچ بڕه‌پارەیه‌ك وەرناگیرێت.

7- کرێی بارھەڵگرەکان مەرزی پەرویزخان ڕێک دەخرێتەوە.

8- پێداچوونەوە بە کرێی پشكنینی كۆمپانیاكانی کوالێتی کۆنتڕۆڵی دەروازەكان دەکرێت.

9- پێداچوونەوە بە پاراستنی بەروبوومی ناوخۆیی دەکرێت لەگەڵ وەزارەتە پەیوەندیدارەكان.

10- 200 دۆنم زەوی بۆ کۆگەکانی بازرگانان دابین دەکرێت كە ئەمیش دەبێتە هۆی ڕەخساندن دوو هەزار هەلی كار بو ناوچەی گەرمیان.