ئاسایشی هەولێر یەکێک لە بکوژی فارس محەمەد ده‌ستگیر ده‌کات

ئاسایشی هەولێر یه‌كێك لە بكوژی فارس محەممەد، بەڕێوەبەری گشتیی فەرمانگەی کارگێڕی لە کۆمیسیۆنی هەڵبژاردن و راپرسی هەرێمی کوردستانی دەستگیرکرد، کە مانگی نیسانی ئەمساڵ لە بەردەم فامیلی مۆڵی هەولێر کوژرا.

تاریق نوری، بەڕێوەبەری ئاسایشی هەولێر راگەیاند: دوای چاودێریكردن و هەوڵدان و، وردەكاری، هێزەكانمان توانیان یەكێك لە بكوژەكانی فارس محەمەد سادق بەڕێوەبەری گشتی لە كۆمسیۆنی باڵای سەربەخۆی هەڵبژاردن و راپرسی دەستگیر بكەن، و رادەستی پۆلیس بكرێت.

دوای روداوی كوشتنی بەڕێز (فارس محەمەد) بەڕێوەبەری گشتی لە كۆمسیۆنی باڵای هەڵبژاردنەكانی هەرێم، تیمەكانمان دەستیان بە لێكۆڵینەوەیەكی پیشەییانە كرد و دوای پشكنینی وینەی كامیراكانی چاودیری، لە ئەنجامدا تاوانكاران دەستنیشان كران و دەركەوت روداوەكە كێشەیەكی كۆمەڵایەتی تەواوە.

ریشەی كێشەكە دەگەڕێتەوە بۆ برینداركردنی (سوپا ساڵح) برازای (فارس محەمەد) لە لایەن (بەرزی غازی باشتەپەیی)ـەوە، لە رێكەوتی 5/12/2017 و سێ رۆژ دواتر (سوپا) بەهۆی سەختی برینەكەیەوە گیانی لەدەستدا. بكەری سەرەكی روداوەكەش بە ناوی (بەرزی) هەڵات بۆ توركیا. دواتر لە رێكەوتی 10/3/2018 لە توركیا (بەرزی غازی باشتەپەیی) كوژراوەتەوە و چەند كەسێكیش بە تۆمەتی ئەو روداوی كوشتنە لە توركیا دەستگیركراون.

هەردوو بنەماڵە كێشەكەیان چارەسەر نەكرد و لە ئەنجامدا بووە كێشەیەكی خوێنداری، تاكو رۆژی 24/4/2018 لە كاتژمێر 8ی سەرلەبەیانیەوە، وەك لە ڤیدیۆ و وێنە و بەڵگەكانی هاوپێچ بەم راگەیاندراوەدا هاتووە، بنەماڵەی (بەرزی) بۆ چەندین كاتژمێر، چاودێری (فارس محەمەد)ــیان كردووە لە لای ماڵەكەی و دواتر لە شوێنی كارەكەی.

كاتژمێر 2:36 خولەكی هەمان رۆژ، لەسەر شەقامی 100مەتری هەولێر و بەرانبەر فامیلی مۆڵ، بە ئۆتۆمبێلی جۆری ئۆپڵ ڤیكتراوە، سێ تاوانبار (فاروق غازی باشتەپەیی، هونەر عەبدولكەریم و كەسێكی دیكە كە وێنەكەی لەگەڵ ئەم راگەیاندراوەدایە) دەستڕێژی گوللە لە (فارس محەمەد) دەكەن و دەستبەجێ گیان لەدەستدەدا. تاونبارانیش بۆ دەرەوەی شاری هەولێر هەڵاتوون و فەرمانی گرتنیان لەلایەن دادگاوە بۆ دەرچووە.

لە ئەنجامی لێكۆڵینەوەكاندا، دەركەوت ئەم روداوی كوشتنە هیچ پەیوەندییەكی بە ململانێی نێوان لایەنە سیاسیە جیاوازەكانەوە نیە و هەردوو بنەماڵە سەر بە یەكێتی نیشتیمانی كوردستانن. وەك بەڕێوەبەرایەتی ئاسایشی هەولێر، داوا لە هاولاتیانی بەڕێز دەكەین، هاوكاری دەزگا ئەمنیەكان بكەن لە بوونی هەر زانیارییەك لەسەر شوێنی خۆحەشاردانی تاوانباران.