نووسینگەی سەرۆك وەزیرانی عێراق رایگەیاند" ئەمڕۆ پێنجشەمە 24-1-2019 محەممەد بن سەلمان، جێنشینی سعودیە لەڕێگەی تەلەفۆنەوە پەیوەندی بە عادل عەبدولمەهدی، سەرۆكوەزیرانی عێراقەوە كرد و پشتگیری تەواوی وڵاتەكەی بۆ سەقامگیری و گەشەسەندنی هەمیشەیی لە عێراق راگەیاند.
لەبەرامبەردا عادل عەبدولمەهدی خۆشحاڵی خۆی بە پێشخستنی پەیوەندییەكانی نێوان هەردوو وڵات بە جێنشینی سعودیە راگەیاند.
ئەمە یەكەم پەیوەندی تەلەفۆنییە لە نێوان ریاز و بەغدا لەو رۆژەی عادل عەبدولمەهدی، بە سەرۆكوەزیرانی عێراق هەڵبژێردراوە. دوای چەندین ساڵ ئاڵۆزی و پشێوی پەیوەندییەكانی نێوانیان، بەغدا هەوڵەكانی بە ئاراستەی بەهێزكردنەوەی پەیوەندییەكانی لەگەڵ وڵاتانی عەرەبی و وڵاتانی كەنداو دەستپێكردوە.
بەپێی چاودێران و شرۆڤەكاران، لە رۆژی پێكهێنانی لە تشرینی دووەمی رابردوو، حكومەتی عێراق هەوڵەكانی چڕكردوەتەوە بۆ ئەنجامدانی گۆرانكاری ریشەیی لە سیاسیەتی دەرەوەیدا، وەكو هەوڵێك بۆ بەدیهێنانی هاوسەنگی پەیوەندیە هەرێمی و نێودەوڵەتییەكانی بە ئامانجی دەرچوون لەژێر چەتری ئێران و خۆبەدوورگرتن لە ململانێكانی ناوچەكە.
کۆمێنت (0)
تا ئێستا هیچ کۆمێنتێک نەکراوە.