پۆلیسی دهۆک: دوو کوڕ به‌تۆمه‌تی کوشتنی باوکیان ده‌ستگیرکران

دوو كوڕ له‌لایه‌ن هێزه‌كانی‌ پۆلیسی دهۆكه‌وه‌ به‌تۆمه‌تی كوشتنی باوكیان و بردنی ته‌رمه‌كه‌ی له‌ هه‌ولێره‌وه‌ بۆ سنوری‌ پارێزگای‌ دهۆك ده‌ستگیركران.

رۆژی یەکشەممە (28-7-2019) تەرمی شۆفێرێکی تاکسی لەنێو ئۆتۆمبێلەکەی لەسەر رێگەی نێوان ناحیەی کەڵەک و موسڵ دۆزرایەوە، دوای چوار رۆژ لە دۆزینەوەی تەرمەکەش پۆلیسی دهۆک رایگه‌یاند: سێ کەس کە دووانیان کوڕی کوژراوەکە بوون، بە تۆمەتی کوشتنی ئەو پیاوە دەستگیرکراون.

ئەمڕۆ پێنجشەممە، هێمن سلێمان، بەرپرسی پەیوەندییەکان و راگەیاندنی پۆلیسی پارێزگای دهۆک لە کۆنگرەیەکی رۆژنامه‌وانیدارایگەیاند: رۆژی 28-7-2019 پۆلیسی دهۆک لە حاڵەتێکی کوشتن ئاگادارکرایەوە، کە کەسێک لەنێو ئۆتۆمبێلەکەیدا لەسەر رێگەی نێوان ناحیەی کەلەک و موسڵ کوژراوە، دەستبەجێ ئەفسەری پۆلیسی نەهێشتنی تاوان لە بەردەڕەش و پۆلیسی بەردەڕەش لەگەڵ تیمێکی بەڵگەی تاوان و دادوەری لێکۆڵینەوە سەردانی شوێنی رووداوەکەیان کرد.

پۆلیسی دهۆک ده‌ڵێت: لە شوێنی رووداوەکە بەپێی ئەو بەڵگانەی لەلای کەسی کوژراو هەبوون، دەرکەوت کوژراو پیاوێکی تەمەن 58 ساڵە بەناوی سامی سلێمان و دانیشتووی شاری هەولێرە، راستەوخۆش تەرمەکەی بۆ لیکۆڵینەوە رەوانەی پزیشکی داد کرا، دواتر لەلایەن بەڕێوەبەی پۆلیسی پارێزگای دهۆک لیژنەیەکی لێکۆڵینەوە و بەدواداچوون پێکهێنرا و لە ماوەی سێ رۆژدا ئەفسەر و پۆلیسەکانی ئێمە توانیان چەند تۆمەتبارێک دەستبەسەر بکەن، کە دووانیان کوڕی تاوانلێکراو بوون.

بەرپرسی پەیوەندییەکان و راگەیاندنی پۆلیسی پارێزگای دهۆک راشیگه‌یاند لە لێکۆڵینەوەکاندا هەردوو کوڕی تاوانلێکراو دانیان بە تاوانەکەیاندا ناوە و ئێستا بەپێی ماددەی 406 لە یاسای سزادانی عێراقی دەستبەسەرن.

ئەوان لە دانپێدانانەکەیان گوتوویانە لە رۆژی 27-7-2019، واتە رۆژێک پێش دۆزینەوەی تەرمەکەی، باوکی خۆیان لەنێو ئۆتۆمبێل لە سەنتەری پارێزگای هەولێر کوشتووە، پاشان بۆ شاردنەوەی تاوانەکەیان تەرمەکەیان هەر بە ئۆتۆمبێلەکەی خۆی بردووەتە سەر رێگەی نێوان ناحیەی کەلەک و موسڵ لە سنووری پارێزگای دهۆک.