ڕۆژی یەكشەممە 1ـی 9ـی 2019 لە سەلاحەددین سەرۆك مەسعود بارزانی لەگەڵ ئەندامانی فڕاكسیۆنی پارتی دیموكراتی كوردستان لە ئەنجوومەنی نوێنەرانی عێراق كۆبۆوە.
لە كۆبوونەوەكەدا كە بە مەبەستی ڕاگۆڕینەوە لەسەر پرسە سیاسییەكان و تاوتوێكردنی دوایین پێشهات و گۆڕانكارییەكانی عێراق ئەنجام درا سەرۆك بارزانی لە وتەیەكدا ڕۆشنایی خستە سەر گرنگی و بایەخی ڕۆڵی پارلەمانتارانی پارتی دیموكراتی كوردستان لە ئەنجوومەنی نوێنەرانی عێراق لەپێناو بەرگریكردن لە مافە ڕەواكانی گەلی كوردستان و جەختیشی لەوە كردەوە كە پێویستە وەك چۆن بەرگری لە مافەكانی گەلی كوردستان دەكەن بە هەمانشێوەیش بەرگری لە مافی هاووڵاتی و دانیشتوانی پارێزگاكانی عێراق بكەن.
لە بەشێكی تری ئەو كۆبوونەوەیە سەرۆك بارزانی بۆچوونی خۆی لەبارەی چارەسەركردنی كێشەكانی نێوان هەولێر و بەغدا بۆ ئامادەبووان شی كردەوە و پەیوەست بە چۆنیەتی كاركردن و پەیوەندی لەگەڵ لایەنە سیاسییەكانی عێراق ئامۆژگاری و ڕێنوێنیی پێویستی خستەڕوو.
هەر لەو كۆبوونەوەیەدا ئەندامانی فڕاكسیۆنی پارتی لە بەغدا سەرنج و تێبینییەكانی خۆیان لەبارەی ڕەوشی سیاسی و كاری پارلەمانی لە ئەنجوومەنی نوێنەرانی عێراق خستەڕوو و جەختیان لە پێویستیی هەبوونی هاوهەڵوێستی و هەماهەنگیی نێوان فڕاكسیۆنە كوردستانییەكان كردەوە بە تایبەت لەسەر ئەو بابەتانەی پەیوەندییان بە ماف و بەرژەوەندییەكانی خەڵكی كوردستانەوە هەیە.
کۆمێنت (0)
تا ئێستا هیچ کۆمێنتێک نەکراوە.