بریکاری وەزیری بەرگری ئەمەریکا پابەندبوونی ئەمەریکای بە پشتگیریکردنی هەرێمی کوردستان دووپات کردەوە.
ئەمڕۆ دووشەممە 2019/11/25 مەسرور بارزانی سەرۆکی حکومەتی هەرێمی کوردستان پێشوازی لە جۆن روود بریکاری وەزیری بەرگری ئەمەریکا بۆ کاروباری سیاسی کرد.
لە دیدارەکەدا کە شۆڕش ئیسماعیل وەزیری پێشمەرگە و رێبەر ئەحمەد وەزیری ناوخۆ ئامادەی بوون ، بریکاری وەزیری بەرگری ئەمەریکا پابەندبوونی ئەمەریکای بە پشتگیریکردنی هەرێمی کوردستان دووپات کردەوە و ئاماژەی بەوەشکرد کە سەردانی مایک پێنس جێگری سەرۆکی ئەمەریکا بۆ هەولێر دووپاتکردنەوەی ئەو پشتیوانیەی ئەمەریکا بوو بۆ هەرێمی کوردستان .
بریکاری وەزیری بەرگری ئەمەریکا هەروەها جەختی لە بەردەوامیدان بە یارمەتیدانی ھێزی پێشمەرگە و گرنگی بەردەوامبوونی هەماهەنگی لە نێوان پێشمەرگە و هێزەکانی عیراقی کردەوە بۆ رووبەڕووبوونەوەی هەڕەشەکانی داعش .
سەرۆکی حکومەتی هەرێمی کوردستان سوپاسی پشتیوانی وڵاتە یەکگرتووەکانی ئەمەریکای کرد و دووپاتی کردەوە کە هەرێمی کوردستان وەک فاکتەرێکی سەقامگیربوونی ئاسایش لە ناوچەکەدا رۆڵی خۆی دەگێڕێت .
کۆمێنت (0)
تا ئێستا هیچ کۆمێنتێک نەکراوە.