لهراگهیاندراوێكدا كهوێنهیهك بۆ مالپهری كوردستان تیڤى نێردراوه ، بهرێوهبهرایهتى پۆلیسى ههولێر رایدهگهێنێت ، لەسەر فەرمانی وەزیری ناوخۆی حكوومەتی هەرێمی كوردستان (د. رێبەر ئەحمەد) و بە سەرپەرشتیی ڕاستەوخۆی بەڕێوەبەری پۆلیسی پارێزگای هەولێر عەمید (دلێر نەجات یاسین نەجاڕ) لە دوای ئەنجامدانی لێكۆڵینەوەیەكی ورد و چڕ و نهێنی لەسەر دۆسیەی منداڵێكی تاوانلێكراو بە ناوی (سایە یونس) تەمەن 11 ساڵ، توانرا تۆمەتباری راستەقینەی ئەم رووداوە قێزەونە ئاشكرا بكرێت.
بەڕێوەبەری پۆلیسی پارێزگای هەولێر، عەمید (دلێر نەجات یاسین نەجاڕ)، لەو بارەیەوە رایگەیاند، رێكەوتی (6/1/2020)، دوای ئاگاداركردنەوەمان بە بوونی تەرمی مندالێكی 11 ساڵان لە گوندی (حەویچكە)ی سنووری ناحیەی گوێڕ، كە لەناو لە دۆڵێكدا فڕێ درابوو، لەسەر فەرمانی وەزیری ناوخۆی حكوومەتی هەرێمی كوردستان (د. رێبەر ئەحمەد)، راستەوخۆ تیمەكانمان دەستیان بە لێكۆڵینەوەیەكی ورد كرد، لە ئەنجامی لێكۆڵینەوەكانیش دەركەوت كە ئەم منداڵە 11 ساڵانە بە ناوی (سایە یونس) لەلایەن دایكییەوە بە ناوی (ب.پ.ع)، كە دانیشتووی شارۆچكەی گوێڕ گوندی گامێشتەپەیە، ئەشكەنجە دراوە و بەو هۆیەوە گیانی لە دەست داوە.
عەمید (دلێر نەجاڕ) هەروەها روونیشی كردەوە، پاش بەدواداچوونی ورد و لێكۆڵینەوە لە چۆنیەتیی تاوانەكە لە شوێنی رووداوەكە، تەرمی منداڵەكە دۆزرایەوە، كە لە دۆڵێك لە نزیك گوندی (حەویچكە) فڕێ درابوو.
ئاماژەی بۆ ئەوەش كرد، لە ئەنجامی لێكۆڵینەوەیەكی ورد و چڕ و نهێنی لەگەڵ سەرجەم خانەوادەی منداڵە تاوانلێكراوەكە، لە ماوەی نزیكەی دوو رۆژ و شەودا لێكۆڵینەوە بەردەوام بوو، دواتر دایكی منداڵە تاوانلێكراوەكە كە تۆمەتباری سەرەكیی تاوانەكەیە، دانی نا بە تاوانەكەیدا كە لە ژێر ئەشكەنجەدا منداڵەكەی خۆی كوشتووە و دواتر تەرمەكەی لە دووریی 700 مەتر لە ماڵی خۆیان فڕێ دابوو، كە ئەم تاوانەشی لە هاوسەرەكەی خۆی شاردبووەوە و پاش چوار رۆژیش هەواڵی پێ دابوو كە (سایە)ی كچیان دیار نەماوە و بزر بووە، ئەمەش بۆ شاردنەوەی تاوانەكە بوو لە خێزانەكەی و رای گشتی.
بەڕێوەبەری پۆلیسی پارێزگای هەولێر، ئەوەشی خستە ڕوو، بەپێی بڕیاری دادوەر، تۆمەتبارەكە بەپێی ماددەی 406 لە یاسای سزادان بەند كراوە و لێكۆڵینەوەكانیش لەسەر ئەم دۆسیەیە بەردەوامن.
شوان عهزیز
کۆمێنت (0)
تا ئێستا هیچ کۆمێنتێک نەکراوە.