سه‌رۆکی په‌رله‌مانی کوردستان پیرۆزبایى له‌یه‌کێتیی نووسه‌رانی کورد ده‌کات

به‌بۆنه‌ی یۆبیلى زێڕینی یه‌كێتیی نووسه‌رانی كورد، د.رێواز فایه‌ق سه‌رۆكی په‌رله‌مانی كوردستان په‌یامێكی پیرۆزبایی ئاراسته‌ی ئه‌ندامانى ده‌سته‌ی باڵا له‌یه‌كێتیی نووسه‌رانی كوردو نووسه‌ران و ئه‌دیبان و رووناكبیرانی كوردستان كرد، كه‌ ئه‌مه‌ ده‌قه‌كه‌یه‌تی:
به‌ڕێزان ئه‌ندامانی ده‌سته‌ی باڵا له‌یه‌كێتیی نووسه‌رانی كورد
نووسه‌ران و ئه‌دیبان و ڕووناكبیرانی كوردستان
به‌بۆنه‌ی یۆبیلی زێڕینی یه‌كێتیی نووسه‌رانی كورد له‌قووڵایی دڵمانه‌وه‌ جوانترین و ڕازاوه‌ترین پیرۆزبایی ئاراسته‌ی سه‌رجه‌م نووسه‌ران و رووناكبیران و ڕۆشنبیرانی كوردستان ده‌كه‌ین و ئومێده‌وارین ئه‌م یاده‌ مەزنە ببێته‌ سه‌رەتایه‌كی نوێ بۆ خزمه‌تکردنی ئەدەب و فەرھەنگی کوردی.
یه‌كێتیی نووسه‌رانی كورد هه‌ر له‌سه‌ره‌تای دامه‌زراندنییه‌وه‌ وه‌ك مەڵبەندێکی ئه‌ده‌بی و ڕووناكبیری ڕۆڵێكی به‌رچاوی بینیوه‌ له‌پاراستنی وشه‌و زمانی ڕەسەنی كوردی، كاریگه‌ریشی له‌مێژووی بنیادنان و پشتیوانیی ئه‌ده‌بی به‌ره‌نگاریدا بێوێنه‌یه‌و له‌په‌نجا ساڵی ته‌مه‌نیدا هه‌میشه‌ به‌هه‌ڵوێسته‌ جوانه‌كانی له‌به‌ره‌ی گه‌ل و شۆڕشدا هاتۆته‌ مه‌یدان و له‌م پێناوه‌شدا خاوه‌نی ده‌یان نووسه‌ری شه‌هیده.
ئەم ڕێکخراوە ڕووناکبیری و ئەکادیمییە ھەر لەدامه‌زراندنیه‌وه‌ له‌هێڵه‌ گشتییه‌كانی شۆڕش لاینه‌داوه‌و نووسه‌رانی خاوه‌ن ئیراده‌و هه‌ڵوێستی نەتەوەیی وێڕای ئه‌وه‌ی کە تووشی جۆره‌ها ئازارو ئه‌شكه‌نجه‌و لێدان و گرتن و ڕاگواستن بوونه‌ته‌وه‌ كه‌چی له‌به‌رامبه‌ر دوژمنه‌ سه‌رسه‌خته‌كه‌ی ئه‌وێ رۆژێ خۆڕاگرانه‌ له‌كۆڕی خه‌باتی شاخ و شاردا به‌نهێنی و به‌ئاشكرا وشه‌ی ئازادیان كردووە‌ به‌دروشم و له‌ماوه‌ی ساڵانی كارکردن و بەخششی ڕۆشنبیریدا خه‌رمانێكی گه‌وره‌یان له‌شاكاری ئه‌ده‌بی و ڕووناكبیری پێشكه‌ش به‌كتێبخانه‌ی كوردی كردووه‌.
ئه‌م یاده‌ شكۆداره‌ له‌مێژووی ئه‌ده‌بی كوردیدا رۆژێكی جوان و پڕشنگداره‌، هیوای سه‌ركه‌وتنی به‌رده‌وامتان بۆ ده‌خوازین و ئومێد ده‌كه‌ین لە داھاتووشدا بەبەرنامەیەکی تۆکمەترو گشتگیرتر کاربکەن بۆ پێشخستنی فەرھەنگ و ئەدەبی کوردی و ئاراستەکردنی نەوەی داھاتوو بەبیرو ھزری قووڵ و پێشەنگانەتان لەپێناو ئایندەی گەش و پاراستنی به‌ها پیرۆزه‌ مرۆڤایەتی و نه‌ته‌وه‌ییه‌كانمان.
د.رێواز فایه‌ق
سه‌رۆكی په‌رله‌مانی كوردستان
2020/2/10