لە سەلاحەددین سەرۆك بارزانی پێشوازی لە مامۆستا سەلاحەددین محەممەد بەهائەدین ئەمینداری گشتیی یەكگرتووی ئیسلامیی كوردستان و شاندێكی یاوەری كرد.
ڕۆژی چوارشەممە 19ـی 2ـی 2020 لە سەلاحەددین سەرۆك مەسعود بارزانی پێشوازی لە مامۆستا سەلاحەددین محەممەد بەهائەدین ئەمینداری گشتیی یەكگرتووی ئیسلامیی كوردستان و شاندێكی یاوەری كرد كە پێكهاتبوو لە د. هادی عەلی سەرۆكی ئەنجوومەنی سەركردایەتی و د. سەلاحەددین بابەكر كارگێڕی ئەنجوومەنی جێبەجێكردن و د. محەمەد هاودیانی ئەندامی سەركردایەتیی و بەرپرسی پەیوەندییەكانی یەكگرتووی ئیسلامیی كوردستان.
لە دیدارەكەدا سەرۆك بارزانی پیرۆزبایی لە سەركەوتنی كۆنگرەی یەكگرتووی ئیسلامیی كوردستانی لە شاندی میوان كرد و پێزانینیشی هەبوو بۆ ڕۆڵ و میانڕۆیی و هەڵوێستەكانی یەكگرتوو لە پڕۆسەی سیاسی و قۆناغە هەستیارەكانی ژیانی سیاسیی هەرێمی كوردستان.
هەر لەو كۆبوونەوەیەدا بیروڕا لەبارەی پێشهات و گۆڕانكارییە سیاسییەكان لەسەر ئاستی ناوچەكە و قەیرانی سیاسی لە عێراق و پڕۆسەی پێكهێنانی حكوومەتی تازەی عێراق ئاڵوگۆڕ كرا.
بارودۆخی هەرێمی كوردستان و تەحەددیاتی بەردەم گەلی كوردستان تەوەرێكی تری ئەو دیدارە بوو و هەوڵدان بۆ دەستبەركردنی برایەتی و تەبایی سیاسی و یەكڕیزی لە پرسە نیشتیمانییەكان بە پێویست زانرا و جەختیش لە كاری هاوبەشی لایەنەكان و دامەزراوەكانی هەرێم كرایەوە بۆ ڕووبەڕووبوونەوەی ئەو هەڕەشانەی كە ئاساییشی كۆمەڵایەتی و پەروەردە و بەهاكانی كۆمەڵگەی كوردستانی دەكەنە ئامانج.
کۆمێنت (0)
تا ئێستا هیچ کۆمێنتێک نەکراوە.