تووشبووانی ڤایرۆسی کۆرۆنا لە جیهاندا 100 هەزار کەسی تێپەڕاند

ئێوارەی ئەمڕۆ هەینی ڕێژەی تووشبووانی ڤایرۆسی كۆرۆنا لە جیهاندا 100 هەزار كەسی تێپەڕاند.

ئاژانسه‌كانى هەواڵ بڵاويان كردەوە، ڕێژەی تووشبووان بە ڤایرۆسی كۆرۆنا 100 هەزاری تێپەڕاندووە و وڵاتانی جیهانیش بەردەوامن لە توندتركردنی ڕێوشوێنەكانی بەرگرتن لە بڵاوبوونەوەی زیاتری ڤایرۆسەكە.

ئاژانسەكە لە دەزگای ئاماری سەر بە ڕێكخراوی زانستی و ئەندازیاریی زانكۆی جۆنز هۆبكنزی گواستەوە كە ژمارەی ڕاستینەی تووشبووانی ڤایرۆسەكە لە جیهاندا گەیشتووەتە 100 هەزار و 330 تووشبوو.

زیاتر لە 80.5 هەزار تووشبوو لە چینن، 6.6 هەزاریش لە كۆریای باشوور، نزیكەی 4.75 هەزار تووشبووش لە ئێران و زیاتر لە 3.85 هەزار تووشبووش لە ئیتاڵیان.

تا ئێستاش ژمارەی گیان لەدەستدانی تووشبووان گەیشتووەتە سێ هەزار و 408 تووشبوو لە جیهاندا، كە لەو ژمارەیەدا سێ هەزار و 42یان لە چین بوون، لە ئیتاڵیاش 148 كەس، لە ئێران 124 كەس و لە كۆریای باشووریش 42 كەسی تووشبووی ڤایرۆسەكە گیانیان لەدەست داوە. هەروەها ژمارەی ئەو تووشبووانەی لە ڤایرۆسەكەش ڕزگاریان بووە 55 هەزار و 694 كەسن.

له‌ لایه‌كى تره‌وه‌، رێكخراوی تەندروستی جیهانی رایگەیاند"ژمارەی توشبوانی كۆرۆنا لەسەرتانسەری جیهان گەیشتووەتە 100 هەزار كەس و ئاشكراشیكرد،" 20 جۆر ڤاكسینی دژە كۆرۆنا ئامادەن بۆ تاقیكردنەوە.