لیژنه‌ هاوبه‌شه‌کانی قایمقامیه‌ت ده‌ست به‌سه‌ر گۆشتی بێمۆردا ده‌گرن‌

له‌لایه‌ن ‌لیژنه‌ی دوی سه‌ربه‌ لیژنه‌‌ هاوبه‌شه‌كانی قائیمقامیه‌تی سلێمانییه‌وه‌ ده‌ست به‌سه‌ر دو ئاژه‌ڵی سه‌ربڕراوی بێمۆر له‌ ناوچه‌ی تانجه‌رۆی شاری سلێمانیدا گیراوه‌.  

بێوه‌ی ئه‌حمه‌د، سه‌رۆكی لیژنه‌كه‌ داوا له‌ هاوڵاتیان ده‌كات گۆشتی سه‌رشه‌قام و بێمۆر نه‌كڕن چونكه‌ ئاژه‌ڵه‌كه‌ و گۆشته‌كه‌شی له‌لایه‌ن به‌ڕێوه‌به‌رایه‌تی ڤێتێرنه‌رییه‌وه‌ پشكنینی بۆ نه‌كراوه.

وتیشی: خواردنی گۆشتی بێمۆر یان گۆشتی ئه‌و ئاژه‌ڵانه‌ی له‌سه‌ر شه‌قامه‌كان سه‌رده‌بڕرێن و ده‌فرۆشرێن مه‌ترسی‌ بۆ سه‌ر ته‌ندروستی مرۆڤ دروست ده‌كات.

رونیكرده‌وه‌: گۆشتێك كە پشكنینی بۆ نەكرێت  هەڵگری جۆرەها میكرۆبی زیان بەخشە كە دەبیتە هۆكاری گواستنەوەی نەخۆشی، بۆیە پێویستە هاوڵاتیان ئاگاداربن و پێش كڕینی له‌و مۆره دڵنیابنه‌وه‌ به‌سه‌ر گۆشته‌كه‌وه‌یه‌ كه‌له‌لایه‌ن كوشتارگەی سلێمانییه‌وه‌ ده‌كرێت.

ئاماژه‌ش به‌وه‌ش ده‌كات به‌فه‌رمانی قائیمقامی سلێمانی بڕی ئه‌و گۆشته‌ی ده‌ستی بەسەرداگیراوه‌ له‌لایه‌ن بەڕێوەبەرایەتی ڤێتێرنەری سلێمانی له‌ناوده‌برێت‌.

دارشتنه‌وه‌ی هه‌واڵ - شوان عه‌زیز