خۆشه‌ویستی شار تووشی رووداو بوو

مستەفا ئیبڕاهیم ناسراو بە (وەرداش) بەهۆی رووداوی كەوتنە خوارەوە لە دیوارێكی بازاڕی رواندز بە سەختی زامداربوو گەیاندرایە نەخۆشخانە.
رۆژنامه‌ نووس سه‌عید فه‌تحی، بەماڵپه‌ری كوردستان تیڤی راگەیاند " بەداخەوە (وەرداش) ژینگە پارێزو خۆشەویستی خەڵكی رواندز بەهۆی رووداوی كەوتنە خوارەوە لە دیوارێك، ران و سەری شكاوەو ئازاری زۆری بە جەستەی گەیشتووە، بۆ چارەسەركردن گەیاندراوەتە نەخۆشخانەی ئاشتی لە سۆران و لەژێر چاودێری پزیشكی دایە،ئێستا باری ته‌ندروستی جێگیره‌.
 وه‌رداش هەموو بەرەبەیانییەك لەكاتی دەركەوتنی تیشكی خۆر كە هێمایە بۆ رۆژێكی نوێی، خۆی و گۆچانەكەی دەستی و بە دەنگە خۆش ئاوازەكەی، تەواوی بازاری شار پڕ دەكات لەگۆرانی و قسەی خۆش، هەر بە دەم وتنەوەی گۆرانی، پاشماوە فڕێدراوەكانی سەر شەقامەكەكان هەڵدەگرێتەوەو درەختەكان ئاو دەدات، ئەو نموونەی وەفاو دڵسۆزییە بۆ شارەكەی، كەسێكە گەورەو بچووكی شار رێزی دەگرن و خۆشیان دەوێت.
شایانی باسە وەرداش کەسێکە نەخۆشی دەروونی ھەیە، بەڵام لەڕواندز رێزی لێدەگێرێت و خۆشەویستی خەڵکی ناوچەکەیه‌.