سه‌رپه‌رشتێ چاره‌سه‌ركرنا نه‌خۆشێن كۆرۆنایێ ل پارێزگه‌ها دهۆكێ دیاركر نه‌خۆشیێن كۆرۆنایێ یێن ره‌وشا وان تێك چوویێ نها هه‌موو هاتینه كۆنترۆلكرن، هنده‌ك جاران ژ وان نه‌خۆشان پێدڤى ب ئوكسجینى دبن، به‌لێ هه‌تا نوكه ل پارێزگه‌ها دهۆكێ ئامیرێ هه‌ناسه‌دانا ده‌ستكرد بۆ نه‌خۆشان نه‌هاتیه بكارئێنان.
د. موئه‌یه‌د ئه‌غالى، سه‌رپه‌رشتێ چاره‌سه‌ركرنا نه‌خۆشێن كۆرۆنایێ ل پارێزگه‌ها دهۆكێ دیاركر كو هه‌تا نوكه 291 نه‌خۆشێن كۆرۆنایێ ل دهۆكێ هاتینه تۆماركرن، ژوانا ژى 196 نه‌خۆش یێن هاتینه چاره‌سه‌ركرن ئه‌ڤه دبیته رێژا 68% ژ چاره‌سه‌ركرنا نه‌خۆشان، ئه‌ڤه‌ژى رێژه‌كا زۆر باشه كو رێژا مرنێ هێشتا ل دهۆكێ سفره و هیچ حاله‌ته‌كێ مرنێ ل دهۆكێ نه‌هاتیه تۆماركرن، ئه‌و نه‌خۆشێن ره‌وشا وان نه‌باش ژى مه هه‌موو هه‌ولدانكرن هه‌تا ئه‌م شیاین ره‌وشا وان كۆنترۆل بكه‌ین و گیانێ نه‌خۆشان ژ مرنێ قورتال بكه‌ین و گۆت: هه‌تا نوكه ل دهۆكێ 95 نه‌خۆشێن كۆرۆنایێ دناڤ نه‌خۆشخانێن كۆرۆنایێ دا ماینه و چارسه‌ریێ وه‌ردگرن ئه‌ڤه ژى دبیته رێژا 32% ژنه‌خۆشان ماینه ناڤ نه‌خۆشخانێ دا.
ناڤهاتى ئه‌وژى دیاركر كو هنده‌ك ژ نه‌خۆشان ده‌مێ نه‌خۆشیێن دومدرێژ هه‌بن، وه‌كو نه‌خۆشیا شه‌كرێ و فشارا خوینێ و ئێشێن دلى و ژیێ وان یێ مه‌زن بیت، ب راستى مه‌ترسى لسه‌ر وان كه‌سان دروست دبیت و گۆت: نوكه مه نه‌خۆش هه‌نه ژیێ وان 50 سال و مه‌زنترن هنده‌ك جاران ئه‌ڤ نه‌خۆشه تووشى ته‌نگه‌نه‌فسێ دبن و پێدڤى ب ئوكسجینێ دبن، وه‌كو دیتر ره‌وشا تووشبوویان یا باشه و هێشتا ئامیرێ هه‌ناسه‌دانا ده‌ستكرد نه‌هاتیه بكارئینان بۆ نه‌خۆشیێن كۆرۆنایێ ل دهۆكێ، به‌لێ دبیت بهێته بكارئینان بۆ وان نه‌خۆشیێن تووشى ته‌نگه‌نه‌فسێ دبن.
سه‌رپه‌رشتێ چاره‌سه‌ركرنا نه‌خۆشێن كۆرۆنایێ ل پارێزگه‌ها دهۆكێ دیاركر كو نه‌خۆشێن كۆرۆنایێ یێن نوكه دناڤ نه‌خۆشخانێ دا نڤاندى ژیێ هنده‌ك ژوان دگه‌هیته 65 سالیێ و هه‌موو نه‌خۆشێن مه نه خه‌لكێ پارێزگه‌ها دهۆكێ نه هه‌موو ژى نه ل دهۆكێ تووشى كۆرۆنایێ بووینه، به‌لكو پتریا نه‌خۆشێن كۆرۆنایێ ل دهۆكێ ل پارێزگه‌ها مۆسل و به‌غدا و هه‌ولێرێ بووینه و پشتى ڤه‌گه‌ریاینه دهۆكێ و پشكنینێن كۆرۆنایێ بۆ وان هاتینه كرن دیاربوویه هه‌لگرێن نه‌خۆشیێ نه و ل ناڤ نه‌خۆشخانێن كۆرۆنایێ دا ل دهۆكێ هاتینه نڤاندن، ئانكو دشێین بێژین پتریا تووشبوویێن كۆرۆنایێ ژ مۆسل و به‌غدا یێن ڤه‌گه‌ریاینه دهۆكێ بتایبه‌تى ژى گه‌له‌ك ژى پاسه‌وان بووینه.
زێده‌تر گۆت تشتێ هه‌ره باش ل دهۆكێ پتریا تووشبوویێن كۆرۆنایێ دناڤ نه‌خۆشخانه‌یێن دهۆكێ دا یێن هاتینه چاره‌سه‌ركرن، هه‌ر چه‌ند هێشتا چاره‌سه‌ریا دروست یا كۆرۆنایێ نه‌هاتیه دیتن، به‌لێ ئه‌م هه‌موو هه‌ولدانان دكه‌ین بۆ باشكرنا ره‌وشا نه‌خۆشێن كۆرۆنایێ نوكه دناڤ نه‌خۆشخانه‌یان دا چاره‌سه‌ریا تووشبوویێن كۆرۆنایێ دهێته كرن و ئه‌م هیڤدارن وه‌لاتى ب سستى وه‌رنه‌گرن و به‌ردوام بن لسه‌ر بجه ئێنانا رێنمایێن ساخله‌میێ .
کۆمێنت (0)
تا ئێستا هیچ کۆمێنتێک نەکراوە.