راپۆرتێکى هاوبه‌ش له‌سه‌ر دۆخی ناوچه‌ کوردستانییه‌کانی ده‌ره‌وه‌ى ئیداره‌ى هه‌رێم ئاماده‌ ده‌کرێت

به‌مه‌به‌ستی ئاماده‌كردنی راپۆرتێكى هاوبه‌ش سه‌باره‌ت به‌دۆخى ناوچه‌ كوردستانییه‌كانی ده‌ره‌وه‌ى ئیداره‌ى هه‌رێم هه‌ردوو لیژنه‌ی ناوچه‌ كوردستانییه‌كانی ده‌ره‌وه‌ى ئیداره‌ى هه‌رێم و لیژنه‌ی كاروبارى پێشمه‌رگه‌ له‌په‌رله‌مانی كوردستان كۆبوونه‌وه‌.

له‌كۆبوونه‌وه‌كه‌دا دۆخی ناوچه‌ كوردستانییه‌كانى ده‌ره‌وه‌ى ئیداره‌ى هه‌رێم و سیاسه‌تی ته‌عریبكردن و ده‌ربه‌ده‌ركردنی خه‌ڵكی ئه‌و ناوچانه‌و مه‌ترسیى میلیشیاكان له‌سه‌ر پێكهاته‌كان و هه‌روه‌ها مه‌ترسییه‌كانی تیرۆریستانی داعش و هه‌ماهه‌نگییه‌كانی نێوان هێزه‌كانی پێشمه‌رگه‌و هێزه‌كانی سوپای عێراق بۆ رووبه‌ڕووبوونه‌وه‌یان به‌چڕوپڕی تاووتوێ كران و بڕیاریشه‌ راپۆرتێكی هاوبەش به‌داتاو به‌ئامارو كۆمه‌ڵێك راسپارده‌و داواكارى له‌لایه‌ن هه‌ردوو لیژنه‌كه‌وه‌ له‌ هه‌رێم و حكومه‌تی فیدرالیی عێراق لەسەر دۆخى ئه‌و ناوچانه‌ ئاماده‌ بكرێت و ئاراسته‌ی ده‌سته‌ی سه‌رۆكایه‌تیی په‌رله‌مان بكرێت به‌مه‌به‌ستی خستنه‌ به‌رنامه‌ى كارى دانیشتنه‌كانی په‌رله‌مانه‌وه‌.

راگه‌یاندراوی هه‌ردوو لیژنه‌ی ناوچه‌ كوردستانییه‌كانی ده‌ره‌وه‌ى ئیداره‌ى هه‌رێم و لیژنه‌ی كاروبارى پێشمه‌رگه‌ له‌په‌رله‌مانی كوردستان