پێككا هاڤیستۆ ،وه‌زیری ده‌ره‌وه‌ی فینلاند، له چوارچێوه‌ی سه‌ردانه‌كه‌ی بۆ به‌غدا له‌گه‌ڵ فوئاد حوسێن، هاوتا عێراقییه‌كه‌ی كۆبوویه‌وه كه له میانیدا ژماره‌یه‌ك پرسی گرنگ و تایبه‌ت به هه‌ردوو وڵات تاوتوێ كراوه.
دواترفوئاد حوسێن، وه‌زیری ده‌ره‌وه‌ی عێراق و پێككا هاڤیستۆ، وه‌زیری ده‌ره‌وه‌ی فینلاند، كۆنگره‌یه‌كی رۆژنامه‌وانییان سازكرد.
فوئاد حوسێن، له كۆنگره رۆژنامه‌وانییه‌كه‌دا رایگه‌یاند كه خۆشحاڵن به كردنه‌وه‌ی باڵیۆزخانه‌ی فینلاند له به‌غدا و گوتی: له‌گه‌ڵ پێككا هاڤیستۆ سه‌باره‌ت به ره‌وشی هاووڵاتییانی عێراق كه له فینلاند نیشته‌جێن، هه‌روه‌ها چۆنیه‌تی پێكه‌وه كاركردن بۆ چاره‌سه‌ركردنی كێشه‌كانیان گفتوگۆمان كردووه.
وه‌زیری ده‌ره‌وه‌ی عێراق راشیگه‌یاند: هه‌روه‌ها باسیان له پرسی بانگهێشتكردنی كۆمپانیاكانی فینلاند به ئامانجی كاری وه‌به‌رهێنان له عێراق كردووه.
لای خۆیه‌وه پێككا هاڤیستۆ، وه‌زیری ده‌ره‌وه‌ی فینلاند، خۆشحاڵی خۆی سه‌باره‌ت به سه‌ردانه‌كه‌ی بۆ به‌غدا نیشان دا و رایگه‌یاند : وڵاته‌كه‌ی به ئه‌رێنییه‌وه ده‌ڕوانێته هاوكارییه ئابوورییه‌كانی نێوان یه‌كتێیی ئه‌ورووپا و عێراق.
به‌یانی ئه‌مڕۆ پێنجشه‌ممه وه‌زیری ده‌ره‌وه‌ی فینلاند، پێككا هاڤیستۆ گه‌یشته به‌غدا كه له میانیدا به ئامانجی تاوتوێكردنی ژماره‌یه‌ك پرسی گرنگ له‌گه‌ڵ گه‌وره به‌رپرسانی عێراق كۆده‌بێته‌وه.
ژێده‌ر / AA
کۆمێنت (0)
تا ئێستا هیچ کۆمێنتێک نەکراوە.