نێچیرڤان بارزانی ،سه‌رۆكی هه‌رێمی كوردستان ،له یادی یازده ساڵه‌ی دامه‌زراندنی بزوتنه‌وه‌ی گۆڕاندا رایده‌گه‌ێنێت، دۆخی ناله‌بار و كێشه و قه‌یرانه‌كان كه به‌رۆكی كوردستانیان گرتووه، یه‌كڕیزی و ته‌بایی و پیكه‌وه‌یی له هه‌موو لایه‌ك ده‌خوازێت تا بتوانین ئه‌م قۆناغه سه‌خته تێپه‌ڕێنین، گه‌له‌كه‌مان له قه‌یران و كێشه‌كان ده‌رباز بكه‌ین.
ئه‌مه‌ش ده‌قی په‌یامه‌كه‌ی نێچیرڤان بارزانی ، سه‌رۆكی هه‌رێمی كوردستانه ..
به‌ڕێز عومه‌ری سه‌ید عه‌لی، ڕێكخه‌ری گشتی
به‌ڕێزان ئه‌ندامی خانه‌ی ڕاپه‌ڕاندن و جڤاتی نیشتمانیی بزووتنه‌وه‌ی گۆڕان
له یادی یازده ساڵه‌ی دامه‌زراندنی بزوتنه‌وه‌ی گۆڕاندا، به گه‌رمی پیرۆزبایی له به‌ڕێزتان و ئه‌ندامان و لایه‌نگرانی بزووتنه‌وه‌كه‌تان ده‌كه‌م، هیوای به‌رده‌وامی و پێشكه‌وتنتان بۆ ده‌خوازم.
بزووتنه‌وه‌ی گۆڕان هه‌ر له دامه‌زراندنییه‌وه له‌سه‌ر ده‌ستی خوالێخۆشبوو نه‌وشیروان مسته‌فا كه له‌م یاده‌دا سڵاو بۆ گیانی ده‌نێرین و یادی ده‌كه‌ینه‌وه، ڕۆڵێكی دیاری له كایه‌ی سیاسیدا گێڕاوه، ئێستاش لایه‌نێكی كاریگه‌ر و سه‌ره‌كیی پێكهاته‌ی حكوومه‌ت و پرۆسه‌ی سیاسیی كوردستانه، هه‌ڵوێسته‌كانیشی به‌رپرسیار و خه‌مخۆرانه‌ن.
هیوادارم ئه‌م یاده گوڕوتینی زیاتر بداته تێكۆشانی سیاسیی بزووتنه‌وه‌كه‌تان له‌پێناو ئامانجه ڕه‌واكانی گه‌له‌كه‌ماندا، ئه‌م بۆنانه ببنه ده‌رفه‌تی قووڵكردنه‌وه‌ی گیانی هاوكاری و پته‌وكردنی هاوخه‌باتی و ده‌ستگرتنی كۆی لایه‌نه تێكۆشه‌ره‌كانی كوردستان به نه‌گۆڕ و ئامانجه نیشتمانی و به‌رژه‌وه‌ندییه باڵاكانی گه‌له‌كه‌مانه‌وه.
دۆخی ناله‌بار و كێشه و قه‌یرانه‌كان كه به‌رۆكی كوردستانیان گرتووه، یه‌كڕیزی و ته‌بایی و پیكه‌وه‌یی له هه‌موو لایه‌ك ده‌خوازێت تا بتوانین ئه‌م قۆناغه سه‌خته تێپه‌ڕێنین، گه‌له‌كه‌مان له قه‌یران و كێشه‌كان ده‌رباز بكه‌ین، پارێزگاری له قه‌واره‌ی ده‌ستووریی هه‌رێمی كوردستان بكه‌ین و هه‌نگاوی زیاتر بۆ خزمه‌تكردنی خه‌ڵكی كوردستان بنێین.
دووباره پیرۆزباییتان لێده‌كه‌م و هیوای سه‌ركه‌وتنتان بۆ ده‌خوازم.
نێچیرڤان بارزانی
سه‌رۆكی هه‌رێمی كوردستان
25/7/2020
کۆمێنت (0)
تا ئێستا هیچ کۆمێنتێک نەکراوە.