سه‌رۆكى هه‌رێمى كوردستان پرسه‌و سه‌ره‌خۆشی خۆی ئاراسته‌ی خانه‌واده‌ى دایكى شه‌هیدان كرد، هیواى خواست خواى مه‌زن گیانى بخاته به‌ر به‌زه‌یى و میهربانیى خۆى.
ئێواره‌ى ئه‌مڕۆ دووشه‌ممه 27/7/2020 به‌ڕێز نێچیرڤان بارزانى، سه‌رۆكى هه‌رێمى كوردستان له په‌یوه‌ندییه‌كى ته‌له‌فۆنیدا له‌گه‌ڵ به‌ڕێز خورشید عوسمان یووسف، كوڕى خوالێخۆشبوو دایكه عایشه‌ى دایكى شه‌هیدان كه ئه‌مڕۆ كۆچى دوایى كرد، پرسه و سه‌ره‌خۆشى له خۆى و خانه‌واده و كه‌سوكارى به‌ڕێزیان كرد.
نێچیرڤان بارزانى وێڕاى ده‌ربڕینى هاوخه‌میى خۆى بۆ كۆچى دواییى خوالێخۆشبوو دایكى شه‌هیدان، پرسه‌ى دایكه عایشه‌ى به پرسه‌ى خۆیان زانى و هیواى خواست خواى مه‌زن گیانى بخاته به‌ر به‌زه‌یى و میهربانیى خۆى و سه‌بوورى و دڵنه‌واییش به خانه‌واده و كه‌سوكاریان ببه‌خشێت.
لاى خۆیه‌وه به‌ڕێز خورشید عوسمان یووسف، سوپاس و پێزانینى خۆى و خانه‌واده‌ى دایكى شه‌هیدانى به به‌ڕێز سه‌رۆكى هه‌رێمى كوردستان گه‌یاند بۆ هاوسۆزى و هاوخه‌مییان له‌گه‌ڵ خانه‌واده‌كه‌یاندا.
دایکە عایشە ناسراو بە دایکی شەهیدان، بەهۆی نەخۆشییەوە لەنەخۆشخانەی ئاشتی سۆران کۆچی دوایی کرد.
کۆمێنت (0)
تا ئێستا هیچ کۆمێنتێک نەکراوە.