چنار سەعد عەبدولڵا ئەندامی ئەنجومەنی سەركردایەتی پارتی دیموكراتی كوردستان لە میانەی بەشداربوونی لە بەرنامەی رۆژەڤی كوردستان رایگەیاند كە بابەتی یەكڕیزی هێزە سیاسییەكان و نێو ماڵی كورد پەیوەستە بە هەموو تاكێكی ئەو كۆمەڵگەیە و تەنها سیاسییەكان ناگرێتەوە .
روونیكردەوە كە دۆخی هەرێمی كوردستان بەهۆی كاریگەری ئابووری و تەندروستی و ئەو پەتایەی كۆرۆنا و كێشەو گرفت و قەیرانەكانی سەرتاپای عێراق و دواتر ئەو لێكەوتانەی دوای رووداوەكانی 16ی ئۆكتۆبەر , ئەوانە هەمووی كۆمەلێك بەربەست بوون كە هاتنه پێش بۆ چۆنیەتی شێوازی ئیدارەدان و بەرێوەبردن ، بۆیە تاكە زەمانەت بۆ دەربازبوون لەو كێشانە یەكبوون و یەكهەڵوێستی نێوان هێزە سیاسییەكانی كوردستانە
گوتیشی لە بیرمان نەچووە هەر دوێنی بوو كاتیك تیرۆریستانی داعش هێرشیان كردە سەر شەنگال و دەشتی نەینەوا و خەڵكیكی زۆر دووچاری ئاوارەیی دەربەدەری بوونەوە . بەڵام بە خۆشحاڵیەوە بەهەوڵی جەنابی سەرۆك بارزانی توانیمان ئەو دوژمنە دڕندەیە بشكێنین ، ئەوەش ئەزموونێكی پرشنگداری بۆ هەرێمی كوردستان مسۆگەر كرد لە دەرەوەو ناوەوەی كوردستان . ئەو پێگەیەش بە یەكهەڵوێستی هێزە سیاسییەكانی كوردستان دروست بوو ، پێكەوە توانیمان دوژمن بشكێنین و ئەزموونێكی سەركەوتوو بوو
خاتوو چنار روونیكردەوە كە ئێستا هەڕەشەكان زۆر جدیین , ئەزموونەكان پێمان دەڵێن كە ئەو هەرێمە هەڕەشەی جیدی لە سەرە .بۆیە پێویستە چوارچێوەیەك بۆ پاراستنی ئاسایشی نیشتیمانی دابنرێت ، هەر لایەنێك یان گروپێك هەرەشەی بكاتە سەر رێگای لێ بگیرێت .
سەبارەت بە رۆڵی پەرلەمانی كوردستان گوتی : پەرلەمانی كوردستان وەك دامەزراوەیەكی شەرعی پێویستە هەڵوێستی هەبێت بەرامبەر بەو هەڵوێستە نامەسئولانەی میدیاكان و نەكەونە ژێر كاریگەری ، كە بەداخەوە هەندێ جار دەكەونە ژێر ئەو هەژموونە و بارگرژی دروست دەبێت
بەرای ئەو رایگەیاند بۆ ئایندە پێویستە لایەنە سیاسییەكان هەوڵی جیدی بدەن بۆ بەهیزكردنی پەرلەمان ، بەلایەنی كەم نیوەی ئەندامانی سەركردایەتی پارتەكان بن بۆ ئەوەی دەسەلاتی سیاسی بێَتە ناو ئەو دامەزراوەیە و رێگری لە هەر كیشەیەك بكات كە دروست دەبێت
لە كۆتایی بەرنامەكە چنار سەعد رایگەیاند هیوادارین ئەوەی لە رابردوو بینیمان روونەداتەوە و لەو كابینەیە پێویستە بە جیدی كار بكریت و ئەو دۆخەش ئەوە دەخوازێت .
گوتیشی بیگومان ئەوەی بینیمان لە دوێنێوە باڤل تاڵەبانی هاوسەرۆكی یەكیتی نیشتیمانی و كۆبوونەوەی لە گەڵ بەرێزان نێچیرڤان بارزانی سەرۆكی هەرێمی كوردستان و مەسروور بارزانی سەرۆكی حكومەتی هەرێمی كوردستان و مایەی دلخۆشیە بۆ خەڵكی كوردستان و ئەو پەیامەی ئەمڕۆش گرنگە كە داوا دەكرێت پەرلەمان تێكەڵی پرسە سیاسییەكان نەكرێت زۆر گرنگیشە لە لایەن لایەنە سیاسییەكان بەدواداچوونی بۆ بكرێت.
کۆمێنت (0)
تا ئێستا هیچ کۆمێنتێک نەکراوە.