نێچیرڤان بارزانى سه‌رۆكى هه‌رێمی كوردستان له‌پرسه‌نامه‌یه‌كدا سه‌ره‌خۆشى له‌خانه‌واده و كه‌س و كاری خاتوو جیهان ره‌شیدی سندی ده‌كات
سه‌رۆكی هه‌رێمی كوردستان رایده‌گه‌ێنێت ، پرسه و سه‌‌رخۆشى له خانه‌واده و كه‌سوكار و هاوكارانى ڕاوێژكارى ئه‌نجومه‌نى وه‌زیرانى هه‌رێمى كوردستان خوالێخۆشبوو خاتوو جیهان ڕه‌شید سندى ده‌كه‌م كه به داخه‌وه ئه‌مڕۆ كتوپڕ كۆچى دوایى كرد. هاوبه‌شى خه‌م و په‌ژاره‌یانم، له خواى مه‌زن داواكارم خوالێخۆشبوو بخاته به‌ر به‌زه‌یى و میهره‌بانیى خۆى و ئارامى و دڵنه‌واییش به هه‌موو لایه‌كیان ببه‌خشێت.
ده‌شڵێت ، خوالێخۆشبوو نموونه‌ى كارامه‌یى و ڕاوێژكارێكى لێهاتووى شاره‌زا و خاوه‌ن ئه‌زموونێكى ده‌وڵه‌مه‌ند و ده‌ستپێشخه‌ر بوو كه هه‌میشه به خه‌مخۆرى و دڵسۆزانه ئه‌رك و كاره‌كانى به ڕێكوپێكى ئه‌نجام داوه و جێپه‌نجه‌ى به چه‌ندین كارى سه‌ركه‌وتووى ساڵانى ڕابردووى بوارى پسپۆڕیى خۆیه‌وه له ئه‌نجومه‌نى وه‌زیران و دامه‌زراوه په‌یوه‌نداره‌كانى حكوومه‌تى هه‌رێمى كوردستانه‌وه دیاره.
نێچیرڤان بارزانى سه‌رۆكی هه‌رێمی كوردستان ئاماژه به‌وه‌ش ده‌كات كه بێگومان كۆچى ناواده‌ى ئه‌و، بۆشایییه‌ك جێده‌هێڵێت و بۆ هه‌میشه له یادى ئێمه و هاوكارانیدا ده‌مێنێته‌وه.
کۆمێنت (0)
تا ئێستا هیچ کۆمێنتێک نەکراوە.