ئاگر لە کوێستان و بناری چیای بەرزین کەوتوتەوە

سوپای پاسدارانی ئێران ھەموو ساڵێک لەم وەرزە تۆپبارانی گوند و کوێستانەکانی سیده‌كان دەکات.

پێشنیوه‌ڕۆی ئه‌مڕۆ دووشه‌ممه‌  3/8/2020 كۆماری ئیسلامی ئێران له‌ سنووری كێله‌شینه‌وه‌ به‌ چڕی تۆپبارانی گوند و كوێستانه‌كانی ده‌ڤه‌ری سیده‌كان دەست پێکرد.

په‌یامنێری كوردستان تیڤی رایگه‌یاند: نزیكه‌ی یەک کاتژمێر به‌ ڕاجیمه‌ و تۆپی دوورهاوێژ  ھەریەک لە  كوێستانه‌كانی به‌ربزین و گه‌روی سنگا و گونده‌كانی ده‌رهۆڵ و کەتینەو بن په‌رێزه‌ی تۆپباران کرد،  تۆپبارانەکە لەنزیک ڕەوەندو کۆچەریەکانی کوێستانی بەربزین و جوتیاران و و گوندنشینانی ناوچەکە بوو، بەھۆیەوە ئاگر لەکوێستان و بناری چیای بەرزین کەوتوتەوە.

بەپێی لێدوانی بەڕێوەبەری شارۆچکەی سیدەکانیش تۆپبارانەکە جگە لە زیانی ماددی ھیچ زیانێکی گیانی بەدواوە نەبووە .

ئاماژەی بەوەش کرد کە سوپای پاسدارانی ئێران ھەموو ساڵێک لەم وەرزە تۆپبارانی گوند و کوێستانەکانی ناوچەکە دەکات و لەساڵانی ڕابردووشدا زیانی گیانی و ماڵی به‌ ھاووڵاتیانی ئەو دەڤەرە گەیاندووە.

بەپێی قسەی ڕەوەندو کۆچەریەکانی ناوچەکەش تائامادەکردنی ئەم ھەواڵە فڕۆکەیەکی بێ فڕۆکەوان و چاودێری بەسەر ناوچە سنووری و کوێستانەکاندا دەسوڕێتەوە و مەترسی دووبارەبوونەوەی تۆپبارانکردنەوەی ناوچەکە ھەیە.