ئه‌ندامه‌كێ بۆردى چاره‌سه‌ریا تووشبوویێن كۆرۆنایێ ل پارێزگه‌ها دهۆكێ دیاركركو گه‌له‌ك گوهۆرێن ب سه‌ر رێنمایێن ساخله‌میێ ل دهۆكێ دا هاتینه كرن ژبۆ خۆ پاراستنێ ژ ڤایرۆسێ كۆرۆنایێ چه‌ند كۆرۆنا زێده‌بیت پلان دهێته گوهۆرین.
د. بلند به‌یار خه‌لیل، ئه‌ندامێ بۆردى چاره‌سه‌ریا تووشبوویێن كۆرۆنایێ ل پارێزگه‌ها دهۆكێ دیاركركو نۆكه 44 كه‌س دناڤ جهێن كه‌ره‌نتینكرنێ دا ماینه، ئه‌ڤه ئه‌و كه‌سن یێن به‌ركه‌فتیێن نه‌خۆشێن خه‌لكێ كه‌مپا چه‌م مشكۆ و كه‌مپا باجد كه‌ندالا نه، وه‌كو دیتر وه‌لاتیێن خۆجهێن دهۆكێ ناهێنه كه‌ره‌نتینكرن ل ناڤ ئوتیلان دا كو چار ئوتیل ل دهۆكێ هه‌نه تووشبوویێن كۆرۆنایێ ناڤدا دهێنه چاره‌سه‌ركرن، ئه‌ڤه وه‌كو بارسڤكى و پشته‌ڤانیى یه بۆ نه‌خۆشخانه‌یان ژبه‌ر جهێ نه‌خۆشان پتر ئه‌و كه‌سن یێن جهێن چاره‌سه‌رى ل مال نه‌ین یان نه‌شێن خوه دناڤ مالان دا كه‌ره‌نتین بكه‌ن، ژبه‌ركو ئه‌ندامێن خێزانا وى گه‌له‌كن، ئه‌ڤه‌ژى دۆرین 150 تووشبوویان ماینه دناڤ ئوتێلان دا، چاره‌سه‌ریا ئه‌و كه‌سێن نه‌خۆشیێن دومدرێژ نه‌بن و خارنا وان یا دروست بیت ئه‌م دشێین ببه‌ینه ئوتێلان چاره‌سه‌ریا وێ بكه‌ن یێن دیتر هه‌كه پێدڤى ئوكسجینى یان ئامیرێ هه‌ناسه‌دانا ده‌ستكرد بیت ئه‌ڤه بۆ نه‌خۆشخانه‌یان دهێنه ره‌وانه‌كرن".
ئاشكه‌را كركو زێده‌بارێ نه‌خۆشخانا لالاڤ هه‌تا 80 تووشبوویان نۆكه تێدا دهێنه چاره‌سه‌ركرن و نه‌خۆشخانا كاڤین ژى نۆكه یا دهێته نووژه‌نكرن وته‌عقیمكرن وپاقژكرن هه‌روه‌سا ژى نه‌خۆشخانا كۆرۆنایێ ژى ل دهۆكێ یا پره ژ تووشبوویان.
د. بلند ئه‌وژى دیاركركو پتر ژ 700 تووشبوویان ل مال چاره‌سه‌ریا خۆ وه‌ردگرن ئه‌ڤه ئه‌و كه‌سن یێن هاتینه تاقیگه‌هێ و پشكنینێن خوه ئه‌نجامداین وره‌نگه گه‌له‌ك حاله‌ت ژى هه‌بن هێشتا پشكنینێن خوه نه‌كرینه ل مالێن خوه دانه و گۆت:نۆكه پلان وه‌سایه ئه‌و كه‌سێن كوخك و تا هه‌بن ئه‌م هژمار دكه‌ین كۆرۆنا هه‌تا پشكنینا خوه ئه‌نجام دده‌ت ئه‌ڤ حاله‌تێن وه‌سا یێن مشه دبن. سه‌باره‌ت رێنمایێن كۆرۆنایێ بۆ وان تووشبوویێن مالێن خوه دا چاره‌سه‌رى وه‌ردگرن د. بلند بیار دیاركر كو پێدڤیه تێكه‌لیا خێزانا خوه نه‌كه‌ت ب تنێ د ژۆره‌كێ دا بیت و كه‌ره‌ستێن وى یێن پاقژكرنێ و مالێ و پێدڤیێن وى د جۆدا بن و كه‌سه‌ك خوارنێ بۆ بگه‌هینیته به‌ر ده‌رگه‌هێ ژوورێ و نه‌چیته ژۆر، هه‌روه‌سا ژى هه‌كه دو ده‌ستئاڤ هه‌بن ئێك بۆ تووشبوویێ كۆرۆنایێ بیت یا دى بۆ ئه‌ندامێن مالا وى بیت باشتره، هه‌روه‌سا كه‌مامێ بكاربینت هه‌كه تووشبوویێ كۆرۆنایێ بڤێت ژ ژۆرا خوه ده‌ركه‌ڤت بچیته دناڤ باغچێ مالا خوه دا دروسته لێ پێدڤیه كه‌مامه و ده‌ستگوركا بكاربینت.
کۆمێنت (0)
تا ئێستا هیچ کۆمێنتێک نەکراوە.