وەزیری دەرەوەی ئەمریکا، مایک پۆمپیۆ لەگەڵ ھاوتا عێراقییەکەی، فوئاد حوسێن لە واشنتۆن بەمەبەستی تاوتوێکردنی پەیوەندییە دوو قۆڵییەکانی نێوان ھەردوو وڵات، کۆبووەوە.
گوتەبێژی وەزارەتی دەرەوەی ئەمریکا، مۆرگان ئۆرتاگوس رایگەیاند مایک پۆمپیۆ و فوئاد حوسێن چاویان بە دیالۆگی ستراتیژی خشاندووەتەوە و جەختیان لەسەر ئەو بنەمایانە کردووەتەوە کە پێشتر لە رێککەوتنی دیالۆگی ستراتیژی نێوان ئەمریکا-عێراق لەسەری رێککەوتوون.
مۆرگان ئۆرتاگوس راشیگەیاند کە وەزیری دەرەوەی ئەمریکا، مایک پۆمپیۆ پشتیوانی خۆی بۆ رێککەوتنی نێوان ھەرێمی کوردستان و عێراق لەسەر پرسی بوودجە دەربڕیووە.
مایک پۆمپیۆ رایگەیاندووە کە بەڵێنی ناردنی ھاوکاری مرۆییان بۆ عێراق داوە و بڕی ٢٠٤ ملیۆن دۆلاریش وەک پشتیوانی پێشکەش بەو وڵاتە دەکەن.
راشگەیەندرا کە ئەو ھاوکارییانە بوارەکانی دروستکردنی شوێنی حەوانە بۆ ئاوارەکان، پێداویستی پزیشکی و خۆراک و ئاو و کەلوپەلی پاککردنەوە دەگرێتەوە.
بەم پێیەش ئەمریکا لەوەتەی سەرەتای ساڵی ٢٠١٩ تاکو ئێستا بە بڕی ٧٠٦ ملیۆن دۆلار ھاوکاری مرۆیی پێشکەش بە عێراق کردووە، ھەروەھا لەلایەن واشنتۆنەوە بڕی ٤٩ ملیۆن و ٥٠٠ ھەزار دۆلار بەمەستی بەرەنگاربوونەوەی ڤایرۆسی کۆرۆنا پێشکەش بە عێراق کراوە.
کۆمێنت (0)
تا ئێستا هیچ کۆمێنتێک نەکراوە.