مسته‌فا كازمی ،سه‌رۆكوه‌زیرانی عێراق، به‌سه‌ردانێكی فه‌رمی گه‌یشته عه‌ممان پایته‌ختی ئوردن.
به‌پێی راگه‌یه‌ندراوێكی نووسینگه‌ی سه‌رۆكوه‌زیرانی عێراق، مسته‌فا كازمی به ئامانجی به‌شداریكردن له لووتكه‌ی سێقۆڵیی نێوان عێراق، ئوردن و میسر گه‌یشتووه‌ته عه‌ممان.
له راگه‌یه‌ندراوه‌كه‌دا ئاماژه به‌وه دراوه كه مسته‌فا كازمی به گه‌یشتنی بۆ عه‌ممان له‌لایه‌ن شای ئوردن، عه‌بدوڵڵای دووه‌م-ه‌وه پێشوازی لێ كراوه.
ئه‌مڕۆ سیشه‌ممه به ئاماده‌بوونی سه‌رۆكوه‌زیرانی عێراق، مسته‌فا كازمی و شای ئوردن، عه‌بدوڵڵای دووه‌م و سه‌ركۆماری میسر، عه‌بدولفه‌تاح سیسی لووتكه‌ی سێقۆڵیی نێوان هه‌ر سێ وڵات له شاری عه‌ممان پایته‌ختی ئوردن ده‌به‌سترێت.
له لووتكه سێقۆڵییه‌كه‌ی نێوان عێراق، ئوردن و میسر سه‌باره‌ت به دۆسیه‌كانی هاوكاری ئابووری و هاوبه‌شی نێوان هه‌ر سێ وڵات گفتوگۆ ده‌كرێت، هه‌روه‌ها پته‌وتركردنی كاری وه‌به‌رهێنان و بازرگانی له‌نێوان عێراق، ئوردن و میسر تاوتوێ ده‌كرێت.
هه‌روه‌ها له میانی لووتكه‌كه‌دا، ئه‌و دۆسیه هه‌رێمییانه ده‌خرێنه به‌رباس كه ده‌بنه هۆی پته‌وتركردنی ئاسایش و سه‌قامگیری له ناوچه‌كه.
لووتكه‌ی سێقوڵیی نێوان ئه‌و عێراق، ئوردن و میسر بۆ یه‌كه‌مجار له ئاداری 2019دا له قاهیره‌ی پایته‌ختی میسر سازكرابوو كه له میانیدا نێوان عێراق، ئوردن و میسر رێككه‌وتن له‌سه‌ر ئه‌وه‌ی كه هاوكاری ئابووری، بازرگانی و وه‌به‌رهێنانی نێوان پته‌وتر بكه‌ن.
کۆمێنت (0)
تا ئێستا هیچ کۆمێنتێک نەکراوە.