سه‌رۆكی هه‌رێمی كوردستان و نوێنه‌رى تایبه‌تى سكرتێرى گشتیى نه‌ته‌وه یه‌كگرتووه‌كان له عێراق، دۆخى سیاسیى عێراق و هه‌رێمى كوردستانیان تاوتوێ كرد.
هه‌ر له چوارچێوه‌ى سه‌ردانه‌كه‌یدا بۆ به‌غدا، پاشنیوه‌ڕۆى ئه‌مڕۆ چوارشه‌ممه 2/9/2020 به‌ڕێز نێچیرڤان بارزانى، سه‌رۆكى هه‌رێمى كوردستان له‌گه‌ڵ خاتوو جینین پلاسخارت، نوێنه‌رى تایبه‌تى سكرتێرى گشتیى نه‌ته‌وه یه‌كگرتووه‌كان له عێراق كۆبووه‌وه.
له كۆبوونه‌وه‌كه‌دا، هه‌ردوولا پرۆسه و دۆخى سیاسیى عێراق و هه‌رێمى كوردستانیان تاوتوێ كرد و تیشكیان خسته سه‌ر په‌یوه‌ندییه‌كان و گفتوگۆى هه‌ولێر ـ به‌غدا و لێكگه‌یشتنى ئه‌و دواییه‌ى هه‌ردوولا له‌سه‌ر بابه‌تى بودجه و مووچه‌ى فه‌رمانبه‌رانى هه‌رێمى كوردستان.
نێچیرڤان بارزانى، ئاماژه‌ى به ڕۆڵى تیمى نه‌ته‌وه یه‌كگرتووه‌كان له عێراق كرد كه ده‌توانێت یارمه‌تیده‌رى هه‌ولێر و به‌غدا بێت بۆ هاندانى گفتوگۆیه‌كى جددیى نێوانیان له‌پێناو چاره‌سه‌ركردنى بنچینه‌یى و یه‌كجاریى كێشه‌كان له‌سه‌ر بنه‌ماى ده‌ستوور، هه‌روه‌ها تیشكى خسته سه‌ر ڕاپۆرتى نوێنه‌رى سكرتێرى گشتیى یووئێن له عێراق كه سه‌باره‌ت به گرنگیى جێبه‌جێكردنى ده‌ستوور و سیستمى فیدراڵى، پێشكه‌ش به ئه‌نجومه‌نى ئاسایشى نێوده‌وڵه‌تى كرد.
دوایین پێشهاته‌كانى بڵاوبوونه‌وه‌ى په‌تاى ڤایرۆسى كۆرۆنا و چۆنیه‌تیى به‌ره‌نگاربوونه‌وه‌ى، هه‌ڵبژاردنى داهاتووى عێراق و یاساى هه‌ڵبژاردن و دۆخى ئاواره و په‌نابه‌ران له كه‌مپه‌كانى هه‌رێمى كوردستان، ته‌وه‌رێكى دیكه‌ى كۆبوونه‌وه‌كه بوو.
کۆمێنت (0)
تا ئێستا هیچ کۆمێنتێک نەکراوە.