سوپای لوبنان رایگەیاند، چوار تۆن ماددەی نیتراتی ئەمۆنیۆمی لە نزیک بەندەری بەیروت دۆزیوەتەوە.
بەڕێوەبەرایەتی رێنمایی لە سوپای لوبنان رایگەیاند، لەسەر راسپاردەی تیمەکانی گومرکی بەندەری بەیروت، هێزێکی سەربە فەوجی ئەندازە گەڕان و پشکنینان لە چوار کۆنتێنەری سەربە گومرک لە دەرەوەی بەندەری بەیروت ئەنجامداوە.
لە راگەیەنراوەکەدا ئەوە روونکراوەتەوە کە لە ناو ئەو کۆنتێنەرانەدا نزیکەی چوار تۆن و ٣٥٠ کیلۆ گرام ماددەی نیتراتی ئەمۆنیۆم دۆزراوەتەوە.
ئاماژە بەوە دراوە کە یەکەکانی سەربە فەوجی ئەندازە کارەکانیان دەستپێکردووە بۆ چارەسەرکردنی ئەو بڕە ماددەی دۆزراوەتەوە.
لە راگەیەنراوەکەدا هیچ وردەکارییەکی دیکە لەمبارەیەوە نەخراوەتەڕوو.
لە ٤ی ئابی رابردوو، تەقینەوەیەکی بەهێز لە بەندەری بەیروت روویدا و بەهۆیەوە ١٩١ کەس کوژران و زیاتر لە شەش هەزاری دیکە برینداربوون.
هاوکات زیانە ماددییەکانی تەقینەوەکە بە نزیکەی ١٥ ملیار دۆلار خەمڵێنرا.
کۆمێنت (0)
تا ئێستا هیچ کۆمێنتێک نەکراوە.