هاوپه‌یمانی نێوده‌وڵه‌تی دژی داعش به‌رده‌وام ده‌بێت له‌ ئه‌رکه‌کانی

شه‌ش ساڵ به‌سه‌ر دامه‌زراندنی هاوپه‌یمانی نێوده‌وڵه‌تی بۆ شه‌ڕی دژ به‌ داعش تێپه‌ڕی، كه‌ له‌ سه‌ره‌تای مانگی 9ی 2014 ، دوای ئه‌وه‌ی داعش رووی هێڕشه‌كانی به‌ره‌و هه‌رێمی كوردستان وه‌رسوڕاند، به‌ سه‌ركردایه‌تی ولایه‌ته‌یه‌كگرتووه‌كانی ئه‌مریكا هاوپه‌یمانێتیه‌كه‌ دامه‌زرا و هه‌رێمی كوردستانیش به‌شێكی كاراو ناوه‌ندو رۆڵگێڕێكی مه‌یدانی بوو له‌ ئه‌رك و ئامانجه‌كانی هاوپه‌یمانێتیه‌كه‌. له‌ سه‌ره‌تادا چه‌ند وڵاتێكی دیار به‌شداری هاوپه‌یمانێتیه‌كه‌ بوون، به‌ڵام به‌رده‌وام له‌ زیاد بووندا بوون و ئێستا ژماره‌یان گه‌یشتۆته‌ نزیكه‌ی 82 وڵات.
به‌م بۆنه‌یه‌و هه‌روها به‌بۆنه‌ی كۆتایی هاتنی ئه‌ركه‌كه‌ی، له‌ کۆنگرەیه‌كی رۆژنامەنوسیدا کە ئەمڕۆ٦/٩/٢٠٢٠ لە شاری ھەولێر سازیكرد، كۆڵۆنێڵ مایڵز کاگینز، وتەبێژی ھاوپەیمانانی نێودەوڵەتی دژ بەداعش رایگه‌یاند: شەش ساڵ پێش ئێستا هێزەکانی هاوپەیمانانی نێودەوڵەتی بۆ شەڕکردن لە دژی رێکخراوی تیرۆریستی (داعش) دامەزران. لە 10ی ئەیلولی 2014ەوە ئێمە 7 ملیۆن کەس و 110 هەزار کیلۆمەتر دووجا زەوی داگیرکراومان ئازاد کردووە.
كۆڵۆنێڵ مایڵز کاگینز، به‌ بایه‌خه‌وه‌ ئاماژه‌ی به‌ رۆڵی هه‌رێمی كوردستان و ئازایه‌تی پێشمه‌رگه‌ كرد وه‌ك به‌شدارێكی كارای شه‌ڕی دژ به‌ داعش. ئاماژه‌ی به‌وه‌شدا، شه‌ڕی دژ به‌ داعش شه‌ڕێكی سه‌خت بوو. ژماره‌یه‌كی زۆر له‌ پێشمه‌رگه‌ و هێزه‌كانی دیكه‌ شه‌هید بوون و بریندار بوون بۆ پاراستنی گیانی خه‌ڵكی دیكه‌. راشگه‌یاند هاوپه‌یمانی نێوده‌وڵه‌تی به‌رده‌وام ده‌بێت و به‌م نزیكانه‌ سه‌نته‌رێكی هامه‌هانگی هاوبه‌ش له‌ نێوان هاوپه‌یمانان و حكومه‌تی عێراق و حكومه‌تی هه‌رێمی كوردستان له‌ هه‌ولێر ده‌كرێته‌وه‌.
شایانی باسه‌، كۆڵۆنێڵ مایڵز کاگینز وتەبێژی ھێزەکانی ھاوپەیمانان کۆتایی بە ئەرکەکەی خۆی ھێنا و بڕیارە کۆڵۆنێڵ وەین مەراتۆ، وەک وتەبێژی نوێی ھاوپەیمانی نێودەوڵەتی دژ بە داعش لە شوێنی ئەو دەست بەکاربێت.