یەكەم كۆبوونەوەی شاندی باڵای حكومەتی ھەرێمی كوردستان بە سەرۆكایەتی قوباد تاڵە‌بانی، لەگەڵ شاندی باڵای حكومەتی فیدراڵ بە سەرۆكایەتی عەلی عەلاوی وەزیری دارایی و جێگری سەرۆك وەزیران بەڕێوەچوو.
سە‌میر ھە‌ورامی وتەبێژی جێگری سە‌رۆكی حكومەتی ھەرێمی كوردستان ڕایگەیاند لەپاش گەیشتنیان بۆ بەغدا، پێش نیوەڕۆی ئەمڕۆ 8 ئەیلولی 2020 یەكەم كۆبوونەوەی فراوانی هەردوو شاندی حكومەتی هەرێم و حكومەتی فیدراڵ لە بارە‌ی كێشە ھە‌ڵپە‌سێردراوە‌كان، بە‌تایبە‌ت پرسی شایستە داراییە‌كانی ھە‌رێم و چۆنییە‌تی جێگیركردنیان لە پڕۆژە یاسای بودجە‌ی گشتی عێراق بۆ ساڵی ٢٠٢١ بەڕێوەچوو.
سە‌میر ھە‌ورامی گوتیشی: لە كۆبوونەوەكەدا بڕیاردرا لیژنەی تایبەتمەند و لاوەكی دروست بكرێن بۆ چڕكردنەوەی گفتوگۆكان لەبارەی پرسەكانی؛ نەوت و گاز، شایستە داراییەكان، كارەبا، دەروازە سنوورییەكان و قەرزەكان.
وتەبێژی جێگری سەرۆکی حکومەتی هەرێم ئە‌وە‌شی راگە‌یاند كە چاوەڕوان دەكرێت ئەم لیژنانە سەرەنجامی بەدواداچوون و گفتوگۆكانیان لەبەر رۆشنایی بڕگە و ماددە‌‌كانی دەستوری عێراق بخەنە بەردەستی وەفدی باڵای هەردوولا بۆ ئە‌وە‌ی رێككە‌وتنیان لە‌بارە‌وە بكرێت.
ئاماژە‌ی بە‌وە‌شدا كە حكومەتی ھە‌رێم ئامادە‌یی دە‌ربڕیوە بۆ رێككە‌وتن لەگەڵ حكومەتی فیدراڵی سە‌بارە‌ت بە پرسی داھاتی نە‌وتی و نا نە‌وتی و داھاتی دەروازە سنورییە‌كان.
کۆمێنت (0)
تا ئێستا هیچ کۆمێنتێک نەکراوە.