قوباد تاڵە‌بانی بۆ حكومە‌تی عێراق: ئامادە‌ین لە‌سە‌ر پرسی داھاتی نە‌وت و دە‌روازە سنورییە‌كان ڕێك بكە‌وین.
كۆبوونە‌وە‌ی شاندی باڵای حكومە‌تی ھە‌رێم بە‌سە‌رۆكایە‌تی قوباد تاڵە‌بانی جێگری سە‌رۆكی ئە‌نجومە‌نی وە‌زیران، لەگەڵ وە‌زیرانی نە‌وت و دارایی و كارە‌بای عێراق، ئێوارە‌ی ئەمڕۆ چوار شە‌ممە ٩/٩، كۆتایی ھات.
سە‌بارە‌ت بە ناوە‌ڕۆكی كۆبوونە‌وە‌كان بە‌گشتی، سە‌میر ھە‌ورامی وتە‌بێژی جێگری سە‌رۆك وە‌زیران رایگە‌یاند: كۆبوونە‌وە‌كان ئە‌رێنی بوون، بە وردی گفتوگۆ لە‌بارە‌ی كێشە ھە‌ڵپە‌سێردراوە‌كان كرا، بە‌تایبە‌ی پرسی شایستە داراییە‌كانی ھە‌رێمی كوردستان و چۆنییە‌تی جێگیر كردنیان لە پڕۆژە یاسای بودجە‌ی ٢٠٢١ كە ئێستا حكومە‌تی عێراقی لە‌سە‌رووبە‌ندی داڕشتنەوەیەتی.
ھە‌روە‌ھا وتی: كۆبوونە‌وە‌ی لیژنە لاوە‌كییە‌كان بە‌ردە‌وام دە‌بن لە بە‌غدا تا ئە‌وكاتە‌‌ی دە‌گە‌نە میكانیزمێكی گونجاو، بە پشت بە‌ستن بە دە‌ستور، بەمەبەستی چارە‌سە‌ركردنی گرفتە یاسایی و تە‌كنیكییە‌كان.
سە‌میر ھە‌ورامی لە‌بارە‌ی رێككە‌وتن لە‌سە‌ر پرسە ھە‌ڵپە‌سێردراوە‌كان، وتی: قوباد تاڵە‌بانی لە كۆبوونە‌وە‌كان ئامادە‌یی ھە‌رێمی نیشانداوە بۆ رێككە‌وتن لە‌بارە‌ی پرسی داھاتی نە‌وت و دە‌روازە سنورییە‌كان و پرسی داھاتە نا نەوتییەكانی تر.
وتە‌بێژی جێگری سە‌رۆك وە‌زیران، ئە‌وە‌شی ڕاگە‌یاند كە شاندی باڵاكەی ھە‌رێم ھە‌ر ئە‌مشە‌و دە‌گە‌ڕێتە‌وە ھە‌ولێر.
کۆمێنت (0)
تا ئێستا هیچ کۆمێنتێک نەکراوە.