مسته‌فا کازمى سه‌ردانی سلێمانی و هه‌ڵه‌بجه‌ ده‌کات

له‌چوار چێوه‌ی سه‌ردانه‌كه‌ی بۆ هه‌رێمی كوردستان بریاره‌  پێش نیوه‌رۆی ئه‌مرۆ هه‌ینی 11 ى 9 ى 2020  مسته‌فا كازمی سه‌رۆك وه‌زیرانى عێراق سه‌ردانى پارێزگای سلێمانى و هه‌له‌بجه‌ بكات 

كازمی له‌سه‌ردانه‌كه‌ی بۆ هه‌ردوو پارێزگادا له‌گه‌ڵ لایه‌نه‌ په‌یوه‌ندیداره‌كان كۆده‌بێته‌وه‌ و دواتر سه‌ردانی ده‌روازه‌ى نێوده‌وله‌تى باشماخ ده‌كات

دوێنێ پێنجشه‌ممه‌ مسته‌فا كازمی سه‌رۆك وه‌زیرانى عێراق سه‌ردانى هه‌رێمی كوردستانی كرد و له‌هه‌ولێری پایته‌خت له‌گه‌ڵ سه‌رۆك مه‌سعود بارزانى  كۆبۆوه‌ و هەردوولا دوایین پێشهات و رەوشی سیاسی عێراق و ناوچەکەیان تاوتووێ کرد، و جەختیان لە خێراکردنی هەولەکان بۆ چارەسەرکردنی کێشەکانی نێوان هەرێمی کوردستان و حکوومەتی فیدڕال کردەوە.

دواتر كازمی له‌گه‌ڵ مه‌سرور بارزانى سه‌رۆك وه‌زیرانى هه‌رێمی كوردستان كۆبۆووه‌ و له‌هه‌مان رۆژدا كازمی سه‌ردانى ده‌روازه‌ی ئیبراهیم خه‌لیلی له‌ زاخۆ كرد 

 هه‌روه‌ها  هه‌ر له‌سه‌ردانه‌كه‌یدا بۆ سنوره‌كه‌ كازمی سه‌ردانى كه‌مپێكی ئاواره‌كانی شنگال و ژماره‌یه‌ك هاووڵاتی كه‌سوكاری ئه‌نفالكراوه‌كانی له‌ نزیكه‌وه‌ بینی و له‌ ره‌وشیانی كۆڵییه‌وه‌. 

كه‌مێك پێش ئێستاش نێچیرڤان بارزانى سه‌رۆكی هه‌رێمی كوردستان له‌نووسینگه‌ى تایبه‌تى خۆی له‌هه‌ولێری پایته‌خت پێشوازی له‌شاندی باڵای حكومه‌تى عێراقی فیدڕال به‌سه‌رۆكایه‌تى مسته‌فا كازمی كرد و بریاره‌ دوای كۆبوونه‌وه‌كه‌ش سه‌رۆكایه‌تی هه‌رێمی كوردستان له‌باره‌ی كۆبوونه‌وه‌كه‌وه‌ راگه‌یاندراوێك بڵاو بكاته‌وه‌