ب گۆژمێ پێنج دۆلارێن ئه‌مریكى دێ كارگه‌هه‌كا داگرتنا فێقى ل ناحیا بامه‌رنێ یا سه‌ر ب قه‌زا ئامێدیێ ڤه هێته دانان.
حه‌مید زۆبێر رێڤه‌به‌رێ ناحیا بامه‌رنێ، بۆ ئه‌ڤرۆ نیوز دیار كر: ئه‌ڤ كارگه‌هه دێ ئالیێ كه‌رتێ تایبه‌ت ڤه هێته دانان و خودانێ وێ ژى ده‌وله‌مه‌نده‌كێ باژێرێ دهۆكێ یه، نوكه خودانێ ڤێ كارگه‌هێ ره‌زامه‌ندى وه‌رگرتیه و هه‌روه‌سا موهله‌تا چێكرنا ڤى كارگه‌هێ ژى ل وه‌زاره‌تا ب دووماهى ئینایه، تێچوویێ ئاڤاكرنا ڤێ كارگه‌ها داگرتنا فێقى ل ناحیا بامه‌رنێ پێنج ملیۆن دۆلارێن ئه‌مریكى نه، دیسان خودانێ ڤێ كارگه‌هێ لبه‌ربوو ده‌مێ سه‌رۆكێ حوكمه‌تێ سه‌ره‌دانا ده‌ڤه‌را ئامێدیێ كرى به‌رێ بنیاتى بهێته دانان، لێ كارێن وان ب دووماهى نه‌هاتبوون له‌وما به‌رێ بنیاتى نه‌هاته دانان، ئه‌ڤ كارگه‌هه دێ ل سه‌ر رووبه‌رێ 63 دۆنه‌مێن ئه‌ردى هێته ئاڤاكرن، ئه‌رد ژى بۆ هاتیه دیار كرن، دێ مه‌زنترین كارگه‌ه بیت ل سه‌ر ئاستێ عیراقێ و هه‌رێما كوردستانێ.
ناڤهاتى گۆت ژى: ئه‌ڤ كارگه‌ها داگرتنا فێقى دێ ته‌ماتێ و چه‌ندین جۆرێن شه‌ربه‌تێ چێكه‌ت، له‌وما ئه‌و دێ به‌رهه‌مێن باجان سوركان و ترى و سێڤان ژ جۆتیاران كرن، دیسان ئه‌و مێشه‌ڤانیه‌كا مه‌زن ژى دانن و دێ هنگڤینێ مێشه‌ڤانان ژێ كرن و دێ ڤرێكه‌نه ژ ده‌رڤه، دیسان ئه‌و جۆره‌كێ تایبه‌ت یێ داران ئینن، كو گوله‌ك پێڤه دهێت و مێش گه‌له‌ك حه‌ز ژ وێ گولێ دكه‌ن بۆ چێكرنا هێنگڤینى، دیسان ئه‌و هنده‌ك نه‌مامێن تایبه‌ت یێن سێڤان و باجان سوركان ده‌نه جۆتیاران ژ پێخه‌مه‌ت به‌رهه‌مه‌كێ باش ژێ بهێت ژ بۆ وێ كارگه‌هێ، ئه‌ڤه دێ بیته هاریكاریه‌ك بۆ فرۆتنا به‌رهه‌مێن جۆتیاران و دێ به‌رهه‌مێ وان باشتر چیت، دیسان دێ پتر سه‌د كه‌سان ل وێ كارگه‌هێ كاركه‌ن و دێ ده‌لیڤان كارى زێده‌كه‌ت و تشته‌كێ گه‌له‌ك ب مفایه بۆ خه‌لكێ ده‌ڤه‌رێ، نوكه خودانێ ڤێ كارگه‌هێ چوویه ده‌رڤه‌ى وه‌لاتى بۆ ئینانا ماكینێن ڤێ كارگه‌هێ، ل ده‌مه‌كێ نێزیك دێ به‌رى بنیاتى هێته دانان و دێ ده‌ست ب ئاڤاكرنێ هێته كرن.
کۆمێنت (0)
تا ئێستا هیچ کۆمێنتێک نەکراوە.