مەكتەبی سیاسی پارتی په‌یامێكی پیرۆزبایی ئاراسته‌ی یەكێتی زانایانی ئایینی ئیسلامی كوردستان كرد، ده‌ڵێت: یەكێتی زانایانی ئایینی، بەردەوام سەنگەرێكی پتەوی رووبەڕووبوونەوەی مەیل و رەوتی دووبەرەكی و توندڕۆیی بووە.
مەكتەبی سیاسی پارتی دیموكراتی كوردستان پەیامێكی پیرۆزبایی بەبۆنەی په‌نجاهه‌مین ساڵیادی دامەزراندنی یەكێتی زانایانی ئایینی ئیسلامی كوردستان بڵاوكرده‌وه و تیایدا هاتووه، بەڕێزان، سەرۆك و ئەندامانی مەكتەبی تەنفیزی یەكێتی زانایانی ئایینی ئیسلامی كوردستان بە بۆنەی یۆبێلی زێڕین و په‌نجاهەمین ساڵیادی دامەزراندنی یەكێتی زانایانی ئایینی ئیسلامی كوردستان، گەرمترین پیرۆزبایی لە ئێوە و ئەندامانی ئەنجوومەنی ناوەند و لق و ناوچەکانی یەكێتیەكەتان و سەرجەم زانایانی ئایینی پیرۆزی ئیسلام لە كوردستان دەكەین.
ئاواتەخوازین وەك هەمیشە بەوپەڕی دڵسۆزی و بەرپرسانە رۆڵی بەرچاو و كاریگەری خۆتان ببینن لە پارێزكاریكردن لە رەوشتبەرزی و گیانی نیشتیمانپەروەری و قووڵكردنەوە و پتەوتركردنی رۆحی تەبایی و پێكەوەژیان لەهەرێمی كوردستاندا.
دامەزراندنی یەكێتی زانایانی ئایینی بە بڕیاری رێبەری نەمر (مستەفا بارزانی) دەستكەوتێكی گرنگی بزووتنەوەی رزگاریخوازی گەلەكەمان بوو، بۆیەش رۆڵی كاریگەری مامۆستایانی ئایینی لە قۆناغە جیاجیاكانی خەباتی نەتەوەیی و نیشتیمانیدا هەمیشە بەرهەمدار بووە لەپێناو ھاوبەندی كۆمەڵایەتی و بڵاوكردنەوەی هەستی نەتەوەیی و نیشتیمانی، لەو رووەوەش جێدەستیان دیارەو مایەی رێز و ستایشن.
یەكێتی زانایانی ئایینی ئیسلامی كوردستان، بەردەوام سەنگەرێكی پتەوی رووبەڕووبوونەوەی مەیل و رەوتی دووبەرەكی و توندڕۆیی بووە، ئەمڕۆش واپێویستە دەكات زیاتر پەرە بەو پەیامەی بدات و جەخت بكاتەوە سەر بنەما رەسەنەكانی كوولتوری دێرین و رەگداكوتاوی پێكەوەژیان و لێبووردەیی و یەكتر قبووڵكردن لە نێو كۆمەڵگەی كوردەواریدا.
دووبارە پیرۆزبایی یۆبێلی زێڕین و په‌نجا ساڵەی تەمەنی پڕ بەخششی یەكێتی زانایانی ئایینی ئیسلامی كوردستان، هیواخوازین هەر سەركەتووبن.
کۆمێنت (0)
تا ئێستا هیچ کۆمێنتێک نەکراوە.