شاندێكی باڵای سه‌ربازی راوێژكارانی ئه‌مریكا له‌عێراق و هه‌رێمی كوردستان، سه‌ردانی وه‌زاره‌تی پێشمه‌رگه‌یان كردو دۆخی ئێستا و مه‌ترسییه‌كانی تیرۆرو جموجۆڵی تیرۆریستان تاوتوێ كرد.
ئه‌مڕۆ 28ی ئه‌یلولی 2020 شۆرش ئیسماعیل، وه‌زیری پێشمه‌رگه‌ی حكومه‌تی هه‌رێمی كوردستان به ئاماده‌بوونی سه‌رۆكی ده‌سته‌ی ئه‌ركان و ئه‌فسه‌رانی پله باڵای وه‌زاره‌ت، له‌گه‌ڵ كۆلۆنێل ڤۆرهیس به‌رپرسی ئۆفێسی ئه‌منی هاوبه‌شی هێزی هاوپه‌یمانان له‌عێراق و كۆلۆنێل جولیات، فه‌رمانده‌ی هێزه‌كانی ئه‌مریكا له‌هه‌ولێر كۆبۆوه.
له‌و كۆبوونه‌وه‌یه‌دا، تاوتوێی دۆخی ئێستای مه‌ترسییه‌كانی تیرۆرو جموجۆڵی تیرۆریستان كرا.
كۆلۆنێل ڤۆرهیس، ئاماژه‌ی به‌دۆخی ئێستای به‌غدا كرد و رایگه‌یاند: سه‌رباری سه‌رهه‌ڵدانه‌وه‌و ده‌ستپێكردنه‌وه‌ی هه‌ڕه‌شه‌كانی تیرۆریستانی داعش، ئه‌و دۆخه‌ی ئێستا دروست بووه، جێگه‌ی نیگه‌رانی هه‌مووانه‌و ئێمه خوازیاری ئه‌وه‌ین سه‌قامگیری و ئاسایشی ناوچه‌كه به‌رقه‌راربێت و به‌یه‌كه‌وه ره‌نگ و بیری تیرۆریستان له‌ناوببه‌ین.
هاوكات ستایشی رۆڵ و قاره‌مانێتی هێزه‌كانی پێشمه‌رگه‌ی كرد، له‌خۆرێكخستنه‌وه‌و ئاماده‌سازییان بۆ پاراستنی سه‌نگه‌ره‌كانیان و رووبه‌ڕووبونه‌وه‌و راوه‌دوونانی تیرۆریستان.
وه‌زیری پێشمه‌رگه ئاماژه‌ی به‌وه‌كرد، گه‌ل و حكومه‌تی هه‌رێمی كوردستان، هه‌میشه دروشمی ئاشتی و ئارامی و پێكه‌وه‌ژیانی به‌رزكردۆته‌وه، پێشمه‌رگه‌ش هاوشانی هه‌ڵگری ئه‌و دروشمانه، خه‌باتی به‌رده‌وام له‌و پێناوه‌دا ده‌كات.
گوتیشی: دۆستایه‌تی كورد و ئه‌مریكا مێژوێكی درێژی هه‌یه‌و وه‌ك وه‌زاره‌تی پیشمه‌رگه، هاوكاری و هه‌ماهه‌نگییه به‌رده‌وامه‌كانی گه‌ل و حكومه‌تی ئه‌مریكا و سوپای ئه‌و ووڵاته به‌رز ده‌نرخێنین، هه‌نگاوه‌كانمان له‌خۆرێكخستنه‌وه‌و خه‌باتی دژ به‌تیرۆریستان پێویستی زۆری به‌ئێوه‌و وڵاتانی تری دۆستمانه له هێزی هاوپه‌یمانان.
له‌لایه‌ن خۆشیانه‌وه، شاندی باڵای سه‌ربازی ئه‌مریكا له‌عێراق و كوردستان، پشتگیری و پاڵپشتی خۆیان بۆ وه‌زاره‌تی پیشمه‌رگه‌و هێزه‌كانی پێشمه‌رگه دووپاتكرده‌وه.
كۆبوونه‌وه، به گفتوگۆكردن له‌سه‌ر پرسی په‌یوه‌ندییه‌كانی نێوان هه‌ولێر و به‌غدا، پڕۆسه‌ی پێكهێنانی خاڵی هاوبه‌ش له‌نێوان هێزی پێشمه‌رگه‌و سوپای عێراق، پڕكردنه‌وه‌ی بۆشایی ئه‌منی له‌ناوچه كوردستانییه‌كانی ده‌ره‌وه‌ی ئیداره‌ی هه‌رێم، كۆتایی هات.
کۆمێنت (0)
تا ئێستا هیچ کۆمێنتێک نەکراوە.