به‌مه‌به‌ستی وردتر چاودێری كردنی دوكانی گۆشت فرۆشه‌كان، لیژنه هاوبه‌شه‌كان له‌گه‌ڵ ڤێتێرنه‌ری سلێمانی كۆده‌بێته‌وه و چه‌ند رێكارێكی نوێ ده‌گرنه‌به‌ر و سه‌رۆكی لیژنه‌كانیش هۆشیاری توند ئاراسته‌ی دوكانی گۆشتفرۆشه‌كان ده‌كات.
له‌شكر حه‌مید، سه‌رۆكی لیژنه هاوبه‌شه‌كانی قائیمقامیه‌تی سلێمانی رایگه‌یاند: به‌مه‌به‌ستی وردتر چاودێری كردنی دوكانی گۆشت فرۆشه‌كان و رێگری كردن له ساغكردنه‌وه‌ی گۆشتی به‌ستو به نرخی فرێش و گۆشتی ئه‌و ئاژه‌ڵانه‌ی پشكنینیان بۆ نه‌كراوه، لیژنه هاوبه‌شه‌كان له‌گه‌ڵ به‌ڕێوه‌به‌رایه‌تی ڤێتێرنه‌ری سلێمانی كۆده‌بێته‌وه.
وتیشی: ژماره‌ی ئه‌و ئاژه‌ڵانه‌ی له‌لایه‌ن كوشتارگه‌ی سلێمانییه‌وه پشكنینان بۆ ده‌كرێت و سه‌رده‌بڕرێن و ره‌وانه‌ی دوكانی گۆشتفرۆشه‌كان ده‌كرێن، له‌راپۆرتێكدا رۆژانه ئاراسته‌ی لیژنه هاوبه‌شه‌كان ده‌كرێت تا له‌كاتی سه‌ردانی لیژنه‌كاندا بۆ دوكانی گۆشتفرۆشه‌كان زانیاری ته‌واویان له‌سه‌ر ئه‌و دوكانه و ژماره‌ی ئه‌و ئاژه‌ڵه سه‌ربڕراوانه‌ی له دوكانه‌كه‌دا هه‌یه، هه‌بێت.
رونیكرده‌وه: هه‌بونی زانیاری له‌سه‌ر دوكانه‌كه و ژماره‌ی ئه‌و ئاژه‌ڵه سه‌ربڕدراوانه‌ی به‌هاوڵاتیانی ده‌فرۆشرێت، رێگری له فرۆشتنی گۆشتی به‌ستو یان گۆشتی ئه‌و ئاژه‌ڵانه‌ی به‌شێوه‌یه‌كی نایاسایی و دور له رێنماییه‌كانی ڤێتێرنه‌ری و ته‌ندروستی سه‌رده‌بڕێن ده‌گرێت.
ئاماژه‌ی بۆ ئه‌وه‌شكرد: هه‌ر دوكانێكی گۆشتفرۆشتن له‌و ژماره ئاژه‌ڵه سه‌ربڕاوه زیاتر هه‌بێت كه به‌ڕێوه‌به‌رایه‌تی ڤێتێرنه‌رییه‌وه بۆی دابین ده‌كات، له‌لایه‌ن لیژنه هاوبه‌شه‌كانی قائیمقامیه‌تی سلێمانیه‌وه ده‌ستی به‌سه‌ردا ده‌گیرێت و شوێنه‌كه‌ش روبه‌ڕوی داخستتن ده‌كاته‌وه.
وتی: له كۆبونه‌وه‌كه‌دا له‌گه‌ڵ به‌ڕێوه‌به‌رایه‌تی ڤێتێرنه‌ری سلێمانی، بڕیاردراوه بۆماوه‌ی هه‌فته‌یه‌ك هه‌ڵمه‌تی هۆشیاری به‌ڕێوه‌ببرێت و له‌لایه‌ن كه‌سانی پسپۆڕ و شاره‌زای ڤێتێرنه‌ری و ته‌ندروستیه‌وه زیانه‌كانی گۆشتی ئه‌و ئاژه‌ڵانه‌ی پشكنینان بۆناكرێت و له‌شوێنی ناته‌ندروست سه‌رده‌بڕێت و به هاوڵاتیان ده‌فرۆشرێت، رونبكرێته‌وه تا هاوڵاتیان نه‌یخۆن.
سه‌رۆكی لیژنه هاوبه‌شه‌كانی قائیمقامیه‌تی سلێمانی هۆشیاری توند ئاراسته‌ی دوكانی گۆشتفرۆشه‌كان ده‌كات و ده‌ڵێت: هه‌ر دوكانێكی گۆشتفرۆشتن گۆشتی به‌ستو، گۆشتی بێمۆر و گۆشتی ئه‌و ئاژه‌ڵانه‌ی له‌لایه‌ن كوشتارگه‌ی سلێمانییه‌وه پشكنینیان بۆ نه‌ركراوه و له‌ده‌ره‌وه‌ی گوشتارگه‌كان سه‌ربڕدراوه له شوێنه‌كه‌یدا بگیرێت، ده‌ستبه‌جێ داده‌خرێت و مۆڵه‌تی كاركردنی لێوه‌ده‌گیرێته‌وه و هه‌روه‌رها له‌ڕیی به‌شی یاسای قائیمقامیه‌تی سلێمانیه‌وه خاوه‌نه‌كه‌شی روبه‌ڕوی رێكاره یاساییه‌كانی دادگا ده‌كرێته‌وه.
کۆمێنت (0)
تا ئێستا هیچ کۆمێنتێک نەکراوە.