سەرۆك بارزانی بۆ كۆچی دوایی بابا شێخ سەرۆكی ڕۆحانیی ئایینی ئێزیدی په‌یامێكی سه‌ره‌خۆشی بڵاوكرده‌وه رایگه‌یاند: بابا شێخ كەسایەتییەكی ئایینی دیار و نیشتیمانپەروەری كوردی ئێزیدی بووه، له بڵاوكردنەوەی تەبایی و پێكەوەژیان درێخی نەكردووە.
بەناوی خودای بەخشندە و میهرەبان
بەداخێكی زۆرەوە ئێوارەی ڕۆژی پێنجشەممە 1ـی 10ـی 2020 كەسایەتیی ئایینی و سەرۆكی ڕۆحانیی ئایینی ئێزیدی شێخ خرتۆ حاجی ئیسماعیل (بابا شێخ) لە شاری هەولێر كۆچی دوای كرد.
بابا شێخ كەسایەتییەكی ئایینی دیار و نیشتیمانپەروەری كوردی ئێزیدی بوو كە لە هەموو بارودۆخێكدا هۆكاری خێرخوازی و چارەسەركردن كێشەكان بووە لەناو خوشك و برا ئێزیدییەكانمان و بۆ بڵاوكردنەوەی تەبایی و پێكەوەژیان درێخی نەكردووە. لە هەمانكاتیشدا بابە شێخ هێمایەكی ئایینی و مەعنەوی بووە و بە تایبەتیش لە بارودۆخی ئێستادا لەدەست دانی خەسارەتێكی گەورەیە.
سەرەخۆشی خۆم ئاراستەی میر حازم تەحسین بەگ میری ئێزیدیان و ئەنجوومەنی ڕۆحانیی ئایینیی ئێزیدی و پیاوانی ئایینی ئێزیدی و خانەوادە و كەسوكاری بابا شێخ و تەواوی خوشك و برایانی ئێزیدی لە كوردستان و هەموو جیهان دەكەم و خۆم بە هاوبەشی خەمیان دەزانم. لە خودای گەورە داواكارم ڕۆحی باب شێخ بخاتە بەر ڕەحمەت و دلۆڤانیی خۆی و سەبر و ئارامی بە هەموو لایەك ببەخشێت.
مسعود بارزانی
1ـی 10ـی 2020
کۆمێنت (0)
تا ئێستا هیچ کۆمێنتێک نەکراوە.