دوای دەستبەکاربوونی ستافی نوێ ئەنجوومەنی شارەوانی هەولێر یەکەمین کۆبوونەوەی خۆی ئەنجامدا، کۆبوونەوەکە بە ئامادەبوونی بەڕێز ساسان عەونی وەزیری شارەوانی و گەشتووگوزار، دکتۆر فرسەت سۆفی پارێزگاری هەولێر، عەبدلواحد احمد سەرۆکی شارەوانی هەولێر و ١٩ ئەندامی ئەنجوومەن دەستیپێکرد.
تەوەری سەرەکی کۆبوونەوەکە بە وتەی وەزیری شارەوانی و گەشتووگوزار دەستیپێکرد و ڕایگەیاند: پاڵپشتی تەواوی ئەنجوومەنەکە دەبن بۆ ڕاییکردنی مامەڵەی هاونیشتیمانیان.
ساسان عەونی، ڕاشیگەیاند:" ئەنجوومەنی شارەوانی جیاوازن لە ئەنجوومەنەکانی پێشوو چونکە نوێنەری سەرجەم بەڕێوەبەرایەتییە خزمەتگوزارییەکانی تێدایە.
ئاماژەی بەوەشدا:" دەبێت ئەنجوومەنەکە زۆر چالاکانە کارەکانی هاونیشتیمانیان ڕاییبکەن ئەمەش کارنامەی کابینەی نۆیەمی حکومەتی هەرێمی کوردستانە.
سەبارەت بە پارێزگاکانی دیکە، وەزیری شارەوانی ڕایگەیاند:" لەداهاتوودا هاوشێوەی هەولێر ئەنجوومەنی شارەوانی پارێزگاکانی دیکەش هەڵدەبژێردرێن و دەست بەکار دەبن.
دواتر فرسەت سۆفی، پارێزگاری هەولێر ڕایگەیاند: پارێزگای هەولێر پاڵپشتی تەواوی ئەنجوومەنی شارەوانی دەبێت لەپێناو ڕاپەڕاندنی کارەکانی ڕۆژانەی هاونیشتیمانیان بەشێوازێکی خێرا.
ڕاشیگەیاند:" هەموو هەوڵێک دەدەین بۆئەوەی خزمەتی شاری هەولێر و دانیشتووانەکەی بکرێت.
هاوکات عەبدلواحد احمد، سەرۆکی شارەوانی هەولێر و سەرۆکی ئەنجوومەنی شارەوانی هەولێر ڕایگەیاند: ئێمە وەک ستافی نوێی ئەنجوومەنی شارەوانی هەولێر بەڵێن دەدەین کە بەشێوەیەکی یاسایی و دادپەروەرانە سەرجەم مامەڵە و کاروباری هاوڵاتیان ڕایی بکەین.
ڕاشیگەیاند:" کاری ئەم ئەنجوومەنە بڕیاردانە لەسەر ئەو مەلەفانەی کە کێشەیان بۆ دروست دەبێت لێرە لەبەردەم ٢١ ئەندامی ئەنجوومەن بڕیار لەسەر چارەسەرکردنیان دەدرێت.
ئاماژەی بەوەشدا:" ئەنجوومەنی نوێی شارەوانی هەولێر نوێنەری سەرجەم بەڕێوەبەرایەتییەکانی خزمەتگوزاری و نوێنەری بەشێک لە سەندیکا و کۆمەڵەکانی تێدایە کە ئەوەش بەڵگەیە بۆ جێبەجێ کردنی کارنامەی کابینەی نۆیەمی حکومەتی هەرێمی کوردستان کە ئەنجامدانی چاکسازییە.
zardasht ahmed
کۆمێنت (0)
تا ئێستا هیچ کۆمێنتێک نەکراوە.